الماتىدا «ماڭگىلىك ەل» پويىزىنىڭ جۇمىسى قورىتىندىلاندى - فوتو

الماتى. قازاقپارات - بۇگىن الماتىدا مارەگە جەتكەن «ماڭگىلىك ەل» پويىزىنىڭ جۇمىسى قورىتىندىلاندى.

ايتا كەتۋ كەرەك، تاۋەلسىزدىكتىڭ 25 جىلدىعىنا وراي استانادان 15 -اقپاندا شىققان پويىز ەل اۋماعىندا 11 مىڭ شاقىرىم جول ءجۇردى. ەلدى مەكەندەرگە توقتاپ 55 مىڭعا جۋىق ادامعا كومەك بەردى.

ولاردىڭ 13 مىڭى جوعارى ساپالى مەديتسينالىق كومەك الدى. پويىز جولاۋشىلارىنىڭ كوبى، ياعني 60 پايىزى مەديتسينا سالاسىنىڭ ماماندارى.

ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ستاتسيونارلىق قىزمەت باسقارماسىنىڭ باسشىسى نۇرلان قىدىربايەۆتىڭ ايتۋىنشا، اكسياعا الماتى مەن استانانىڭ ەڭ ۇزدىك دارىگەرلەرى، 25 سالا مامانى قاتىسقان.

«دارىگەرلەر ادامداردى كۇندە قابىلدادى. تاجىريبەلى ماماندار نەۆرولوگيالىق، كارديولوگيالىق ناۋقاستارعا دياگنوز قويدى. ءار ايماقتىڭ وزىنە ءتان اۋرۋلارى بار ەكەنىن بايقادىق. ماسەلەن، سولتۇستىك پەن شىعىستا قاتەرلى ىسىك كوپ، باتىس پەن وڭتۇستىكتە تۋۋ كورسەتكىشى جوعارى. ياعني بۇل وڭىردە بالالار دارىگەرىنىڭ كومەگى كوبىرەك قاجەت بولدى»، - دەدى ن. قىدىربايەۆ.

ونىڭ ايتۋىنشا، دياگنوز قويىلعان ازاماتتارعا ودان ءارى قارالۋ ءۇشىن ورتالىق مەكەمەلەرگە جولداما بەرىلدى.

سونداي- اق، اكسيا الماتىدا دا جالعاسىپ جاتىر. وسى ۋاقىتقا دەيىن 170 ادام قارالىپ ۇلگەردى.

قالالىق دەنساۋلىق ساقتاۋ باسقارماسىنىڭ ۇسىنىسىمەن دارىگەرلەر الاتاۋ جانە ناۋرىزباي اۋداندارىندا قابىلداپ جاتىر.

      

اۆتور: گۇلميرا عوسمان-ءالي