قازاق كىلەمدەرى الەمدىك ساۋدا جەلىسىندە ساتىلادى

استانا. قازاقپارات - ەندى قازاقستاندا توقىلعان كىلەمدەر الەمدەگى ەڭ ءىرى ساۋدا جەلىلەرىنىڭ ءبىرى - IKEA ارقىلى ساتىلاتىن بولادى. ءتىپتى، سول ءۇشىن ارنايى كىلەم ۇلگىلەرى دە دايىندالدى. ەكسكليۋزيۆتى ونداي توسەنىشتەر تەك اتالعان جەلىدە عانا ساۋداعا شىعارىلماق،

 دەپ جازادى «ەگەمەن قازاقستان» گازەتى. «KAZNEX INVEST» ا ق وكىلى ايگەرىم ءجۇسىپوۆانىڭ ايتۋىنشا، IKEA- عا وتاندىق كىلەمدەردى «بال تەكسيل» ج ش س جەتكىزىپ تۇرادى. ول كىلەمدەردىڭ ديزاينى، تۇگىنىڭ قالىڭدىعى مەن ۇزىندىعى الەمدىك نارىققا ارنالىپ، ەرەكشە دايىندالعان.

«بيىل دا اتالعان سەرىكتەستىكتىڭ ونىمدەرىن ناسيحاتتاۋ جۇمىستارىن جالعاستىرامىز. اتاپ ايتقاندا، وڭتۇستىك كورەيا، لاتۆيا، تاجىكستان سىندى ەلدەردە قازاقستاندا توقىلعان كىلەمدەردىڭ تانىستىرىلىمدارى وتەدى»، - دەيدى «KAZNEX INVEST» وكىلى.

«بال تەكسيل» كومپانياسىنىڭ كوممەرتسيالىق ديرەكتورى قۋان ىسقاقوۆتىڭ سوزىنە قاراعاندا، كاسىپورىن جىلىنا بەس ميلليون شارشى مەتر كىلەم توقيدى. ال، جىلدىق ساتىلىمنىڭ 30 پايىزىن رەسەي، ۋكراينا، قىرعىزستان، ارمەنيا جانە بەلارۋس ەلدەرىنە جىبەرىلەتىن ەكسپورت قۇرايدى. بيىل IKEA- نىڭ رەسەي نارىعىنداعى وكىلدىگىمەن كەلىسىمشارت جاساسقان سەرىكتەستىك جىل سوڭىنا دەيىن ەكسپورت كولەمىن 50-60 پايىزعا دەيىن ارتتىرۋدى كوزدەپ وتىر.

ايتا كەتەيىك، IKEA جەلىسىنىڭ وكىلدەرى بىلتىر وتكەن «تەكسيللەگپروم-2015» كورمەسىندە قازاقستاندا دايىندالعان كىلەمدەرگە ەرەكشە نازار اۋدارىپ، قىزىعۋشىلىق تانىتقان.