جامبىل وبلىسىندا قىمىزبەن ەمدەيتىن ساۋىقتىرۋ كەشەنى اشىلادى

استانا. قازاقپارات - جامبىل وبلىسىنداعى شارۋا قوجالىق يەلەرى مال شارۋاشىلىعىنان بولەك، تۋريزم سالاسىنا دا بەت بۇرا باستادى. تۇرار رىسقۇلوۆ اۋدانىندا «شاۋشەن» شق فەرماسىنىڭ جانىنان قىمىز دايىندايتىن سەح سالىپ، ساۋىقتىرۋ كەشەنىن سوعىپ جاتىر.

 بۇل تۋرالى جامبىل وبلىسى اكىمدىگىنىڭ باسپا ءسوز قىزمەتىنەن حابارلادى.

«شاۋشەن» شارۋا قوجالىعىنىڭ باسشىسى سايرانباي دونەنبايەۆ تاۋ ەتەگىنەن قىمىزبەن ەمدەۋ ورتالىعىن اشۋدى بۇرىننان ويلاستىرىپتى. ويعا العان جوباسىن ىسكە اسىرۋ ماقساتىندا كوپ ىزدەنىپ، ماماندارعا دا قايىرىلعان.

شارۋا 2014 - جىلى قىمىز ءوندىرۋ ءۇشىن ءوز قاراجاتىنا جالپى قۇنى 250 ميلليون تەڭگە جىلقى فەرماسى جوباسىن ىسكە قوستى. قازىر مۇندا جەلىدە ەكى اۋىسىمدا (كۇندىزگى جانە تۇنگى) 250-250-دەن 500 بيە بايلانىپ تۇر. الداعى ۋاقىتتا جەلىگە مىڭ بيە بايلاۋ جوسپارلارىندا بار.

 تاۋ بوكتەرىندەگى قىمىزبەن ەمدەۋ ورتالىعىندا قولعا الىنعان زاماناۋي قوناق ءۇي، ساۋنا، باسسەين تاعى باسقا دا نىسانداردىڭ قۇرىلىسى تولىق اياقتالدى. قىمىزدىڭ باعاسى قاراپايىم تۇرعىندارعا قولجەتىمدى بولادى. ەرەكشە اتاپ وتەرلىگى، شارۋاشىلىق باسشىسى مۇندا ۇلى وتان سوعىسىنىڭ ارداگەرلەرىنىڭ قىمىزبەن ەمدەلۋىنە ەسىكتەرى ايقارا اشىق، بۇل رەتتە تەگىن ارنايى ەكى بولمە قاراستىرىلعان.

تاجىريبەلى تەحنولوگتار سۇرانىسقا قاراي ۇلتتىق سۋسىننىڭ بىرنەشە ءتۇرىن دايىندايدى. نەگىزىنەن تاپسىرىس استانا، الماتى قالالارىنان تۇسەدى. فەرمادا كوبىندە حالىقتىڭ سۇرانىسى بويىنشا جۋاس قىمىز، اساۋ قىمىز، ءسۇر قىمىز دايىندالادى. قىس ايلارىندا سۇرانىس كوبىنە اساۋ قىمىزعا بولادى. ال جازدا جۋاس قىمىزعا سۇرانىس كوپ. سوندىقتان 20 تونناعا شاقتالعان قويماسى بار.

جۋىردا مەملەكەتتىڭ «بيزنەستىڭ جول كارتاسى-2020» باعدارلاماسى ارقىلى 7 شاقىرىم جەردەن ەلەكتر جەلىسى تارتىلدى. ەندىگى مىندەت - ساياحاتشىلاردى ىنتالاندىراتىن باعدارلاما جاساقتاپ، تۋريستىك سالادا جۇمىس ىستەيتىن ماماندار دايارلاۋ.

تۋريستەردى قابىلداۋ ءۇشىن كەشەن EXPO-2017 كورمەسىنىڭ الدىندا تولىق قۋاتىنا قوسىلۋى جوسپارلانىپ وتىر.