ءانشى دانا: جارى بار قوڭىربايەۆپەن قۇشاقتاسۋ وڭاي بولمادى

استانا. قازاقپارات - كۇنى كەشە ارمان قوڭىربايەۆتىڭ ءوزىن اكتەرلىك قىرىنان سىناپ كورگەنى تۋرالى جازعان بولاتىنبىز.

ول دوسىنىڭ ۇسىنىسىن جەرگە تاستاماي بەينەبايانعا تۇسۋگە كەلىسىم بەرەدى. الايدا بەينەبايانداعى ءرولى وزىنە عانا ەمەس، سۇيىكتىسىنە دە، ارىپتەسىنە دە قيىندىق تۋدىرعان سەكىلدى. بۇل تۋرالى «ريەۆيۋ» باعدارلاماسى حابارلايدى.

قازاق ەستراداسىنا جارق ەتىپ جاڭا جۇلدىز كەلدى. ول جۇلدىزدىڭ ەسىمى دانا. ازىرگە بويجەتكەن تۋرالى كوپ اقپارات جوق. ويتكەنى ول شوۋ- بيزنەس الەمىنە ەندى عانا قادام باسىپ كەلەدى. جاس ەكەنىنە قاراماستان، ءانشى وزىنە بارىنشا سەنىمدى.

حالىققا ۇسىنعالى وتىرعان «جانىمدا بولشى» بەينەبايانى ماحاببات ليريكاسىن جىرلايدى. اتالعان بەينەباياندا باستى رولدەردىڭ ءبىرىن ارمان قوڭىربايەۆ سومدايدى.

باستاپقىدا قۇشاقتاسۋ جايلى ءسوز قوزعالماعان ەكەن. وسىنىڭ سالدارىنان ءتۇسىرىلىم الاڭىندا قيىندىقتار تۋىنداعان.

بۇل تۋرالى «پروديۋسەردەن ءوزىم دە نە سەبەپتى ارمان قوڭىربايەۆتى تاڭداعانىن سۇرادىم. ول وتباسىلى ادام عوي. وتباسىلى ادامعا سەزىمىڭدى بىلدىرۋدە قيىن ەكەن»، - دەيدى دانا.

اشا ماتاي ءتۇسىرىلىم الاڭىنا كۇيەۋىن جالعىز جىبەرمەستەن بىرگە بارعان ەكەن. ءتىپتى باستاپقىدا جۇبايىنىڭ ءالى جۇلدىزى جانباعان ءانشىنىڭ بەينەبايانىنا تۇسۋىنە قارسى بولعان. ال ارمان ءوز كەزەگىندە وتباسىلى ازامات ەكەنىن، سۇيىكتىسى باردا بوتەن قىزدى قۇشاقتاۋدىڭ قيىن ەكەنىن ايتتى.

قازاق ەستارداسىندا جۇپ بولىپ ونەر كورسەتىپ جۇرگەن عاشىقتار كوپ. الايدا ارمان اشا ەكەۋىنىڭ ومىرىندە قىزعانىشقا ورىن بولمايتىندىعىن، ارالارىندا تەك قانا ادالدىق بولاتىنىن ايتادى.

ەستەرىڭىزدە بولسا وسى ۋاقىتقا دەيىن ارمان قوڭىربايەۆ اشانىڭ قىزعانىشىن وياتىپ الۋدان قورقاتىندىعى تۋرالى جازعان بولاتىنبىز.

 

Stan.kz