وباما ەكى ءجۇزدى ساياسات ۇستانىپ وتىرما؟

استانا. قازاقپارات - ۇلى بريتانيانىڭ استاناسى - لوندون قالاسىنىڭ مەرى بوريس دجونسون بىرىككەن كورولدىكتى ەۋرووداق قۇرامىندا قالۋعا ۇگىتتەي وتىرىپ، ۆاشينگتوننىڭ كارى قۇرلىقتا «ەۋروپا قۇراما شتاتتارىن» قۇرۋدى كوزدەيتىنىن مالىمدەدى.

بۇل تۋرالى Daily Telegraph مالىمەتىنە سۇيەنگەن ras.kz حابارلادى.

لوندون مەرى وسىعان وراي ا ق ش  پرەزيدەنتى باراك وبامانى ەكى ءجۇزدى ساياسات ۇستانىپ وتىرعانىن اتاپ ءوتتى. ول ا ق ش- تىڭ ۇلى بريتانياعا ەۋروپا وداعى ماسەلەسىندە قىسىم جاساماق بولعان ارەكەتىن قاتتى سىنعا الدى.

ەسكە سالا كەتەيىك، ەلدىڭ پرەمەرى دەۆيد كەمەرون بيىلعى جازدا رەفەرەندۋم وتكىزىپ، ازاماتتاردىڭ ە و- دا قالعىلارى كەلەتىن- كەلمەيتىندەرىن انىقتاپ الۋعا ۋادە بەرگەن بولاتىن. مۇنىڭ اقىرى جاقسى بولا قويمايتىنىن سەزىنگەن ارىپتەستەر قازىر بريتانياعا وزدەرىنشە اسەر ەتپەك بولىپ جاتىر. سونىڭ ىشىندە «اعا» رولىندەگى ا ق ش بۇل ەلگە تىكەلەي نۇسقاۋ كورسەتپەككە قۇمارلىق تانىتىپ كەلەدى.

ءوزى نيۋ- يوركتە تۋعان دجونسون گازەتتەگى ءوز باعانىندا شتاتتاردىڭ، اتاپ ايتقاندا، وبامانىڭ ارەكەتىنەن ەكىجۇزدىلىك كورىپ وتىرعانىن اتاپ وتكەن. ول ۇلى بريتانياعا بۇل وداقسىز حالىقارالىق ساياساتقا ىقپال جاساي المايتىنى تۋرالى تۇجىرىمدى تاڭباق بولىپ الەك. ال ايتىلىپ وتىرعان وداعىنىڭ قازىر قانداي جاعدايدا ەكەنىن ويلارىنا دا المايدى.