قازاقستاندىق كاسىپقوي بوكسشىنىڭ قارسىلاسى بەلگىلى بولدى

استانا. قازاقپارات - قازاقستاندىق كاسىپقوي بوكسشى باحتيار ەيۋبوۆ سپورتتىق مانسابىنداعى ون ءبىرىنشى جەكپە-جەگىن نيۋ-يوركتە (ا ق ش) وتكىزەدى.

2016-جىلدىڭ 15- ساۋىرىنە جوسپارلانعان جەكپە-جەكتە وتانداسىمىز جەرگىلىكتى بوكسشى سامۋەل تيحپەن جۇدىرىق تۇيىستىرەدى، دەپ جازادى massaget.kz.

29 جاستاعى قازاقستاندىق بوكسشى سوڭعى جەكپە-جەگىن 22 قاڭتار كۇنى وتكىزىپ، امەريكالىق دجارەد روبينسوندى ءۇشىنشى راۋندتا-اق نوكاۋتپەن جەڭگەن بولاتىن. وسىعان دەيىن وتكىزگەن ون جەكپە-جەگىندە دە باحتيار ەيۋبوۆ مەزگىلىنەن بۇرىن جەڭىسكە جەتكەن.

باحتيار ەيۋبوۆ پەن سامۋەل تيح اراسىنداعى جەكپە-جەك 8 راۋندقا جوسپارلانعان. ءبىرىنشى جارتىلاي ورتا سالماق (63,5 كەلىگە دەيىن) دارەجەسىندە وتەدى. امەريكالىق بوكسشى وسىعان دەيىن 9 كەزدەسۋ وتكىزىپ، 7 دە جەڭىسكە جەتكەن. 1 رەت جەڭىلىس تاپسا، 1 جەكپە-جەگىندە قارسىلاسىمەن تەڭ تۇسكەن.

باحتيار ەيۋبوۆ پەن سامۋەل تيح اراسىنداعى جەكپە-جەكتى امەريكالىق بەدەلدى تەلەارنا  «Show Time» تىكەلەي ەفيردە كورسەتەدى.

ايتا كەتەيىك، باحتيار ەيۋبوۆتىڭ جۇدىرىقتاسۋ مانەرى وزگەشە. ول قارسىلاسىن ءبىرىنشى راۋندتا-اق ۇرىپ قۇلاتۋدىڭ جولىن ىزدەيدى. وسىعان دەيىن وتانداسىمىز سپورتتىق مانسابىندا ءبىر قارسىلاسىن (جوزە بريۋيەر، 2012-جىل) 9 سەكۋندتا جەڭگەن. ونىڭ جۇدىرىقتاسۋ مانەرىن 1990-جىلدارى كاسىپقوي بوكس شارشى الاڭىندا جاسىنداي جارقىلداعان امەريكالىق بوكسشى دجەرالد ماككلەللانعا دا ۇقساتۋعا بولادى. ول دا قارسىلاسىن ءبىرىنشى راۋندتا-اق جەڭىپ شىعۋدى باستى ماقسات تۇتاتىن بوكسشىلاردىڭ ءبىرى بولاتىن.