ا. مىرزاحمەتوۆ: «نۇر وتان» جاڭا شىنايىلىق جاعدايىندا جۇمىسپەن قامتۋدى قولداۋدى ۇسىنادى

 استانا. قازاقپارات - «نۇر وتان» جاڭا شىنايىلىق جاعدايىندا جۇمىسپەن قامتۋدى قولداۋدى ۇسىنادى. بۇگىن ساياسي پارتيالار اراسىنداعى تەلەپىكىرسايىس بارىسىندا «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆ وسىلاي دەدى.

 «جاڭا شىنايىلىق جاعدايىندا جۇمىسپەن قامتۋدى قولداپ، ەكونوميكانىڭ ساپالى تۇرلەنۋىن جالعاستىرۋ قاجەت. بۇل ەكونوميكانىڭ سىرتقى فاكتورلارعا تاۋەلدىلىگىن تومەندەتۋ ءۇشىن جاسالادى»، - دەدى ول.

ونىڭ اتاپ وتۋىنشە، جۇمىسپەن قامتۋ مىندەتىن جۇزەگە اسىرۋ ءۇشىن پرەزيدەنتتىك «نۇرلى جول» باعدارلاماسى نەگىزىندە داعدارىسقا قارسى شارالار قابىلدانعان. ول 400 مىڭ جۇمىس ورنىن قۇرۋعا مۇمكىندىك بەرەدى.

«مۇنان بولەك، مەملەكەت باسشىسىنىڭ تاپسىرماسىمەن «جۇمىسپەن قامتۋدىڭ جول كارتاسى» كۇشەيتىلدى. اعىمداعى جىلى بۇل ماقساتتارعا 60 مىڭ جۇمىس ورنىن قولداۋعا مۇمكىندىك بەرەتىن 100 ميلليارد تەڭگە ءبولىندى»، - دەدى پارتيا ءتوراعاسىنىڭ ءبىرىنشى ورىنباسارى.

ا. مىرزاحمەتوۆتىڭ اتاپ وتۋىنشە، تاۋەلسىزدىك جىلدارى ىشىندە ەلىمىزدىڭ ەكونوميكاسى 59 تريلليون تەڭگە ينۆەستيتسيا تارتىلعان.

«حالىقتىڭ شىنايى تابىسى 3,5 ەسە ءوستى. تەك سوڭعى 10 جىلدا عانا شاعىن جانە ورتا بيزنەس ۇلەسى 2,5 ەسە ءوسىپ، بۇل سالادا ەڭبەكپەن قامتىلعانداردىڭ سانى 1 ميللوننان 3 ميلليون ادامعا دەيىن كوبەيدى»، - ەدى ول.

سونىمەن قاتار ول يندۋستريالاندىرۋ باعدارلاماسىنىڭ العاشقى 5 جىلدىعىندا وڭدەۋ ونەركاسىبىنىڭ 28 جاڭا سەكتورى قۇرىلىپ، 3 مىڭ جاڭا ءوندىرىس يگەرىلدى جانە 400 جاڭا ءونىم ءتۇرى شىعارىلدى.

 اۆتور: مارلان جيەمباي