جاپپاي ەڭبەك ەتەتىن ەلدە كەدەيلىك بولماۋى ءتيىس - ۆ. كوسارەۆ
ايتا كەتەرلىگى، پىكىرسايىس ەرەجەسىنە سايكەس، «اق جول» پارتياسىنىڭ ءتوراعاسى ازات پەرۋاشيەۆ قارسىلاستارىنا، سونىڭ ىشىندە ق ح ك پ وكىلىنە سۇراق قويعان بولاتىن. «سىزدەردىڭ پارتيالارىڭىز بايلارعا، اۋقاتتى ازاماتتارعا قارسى شىعىپ ءجۇر. ءبىز، كەرىسىنشە، كەدەيلىكتى جەڭۋ كەرەك دەپ ويلايمىز. كىل كەدەيلەر تۇراتىن ەلدە مەملەكەتتى قالاي قۇرماقسىزدار؟» - دەدى ازات پەرۋاشيەۆ.
ءوز كەزەگىندە كوممۋنيستەر پارتياسىنىڭ وكىلى ۆلاديسلاۆ كوساريەۆ جاپپاي ەڭبەك ەتەتىن ەلدە كەدەيلىك بولماۋى تيىستىگىن، سونىمەن بىرگە، بارلىق ەڭبەككەرلەردىڭ ەسەبىنەن ءبىر عانا ساناتتار بايىپ شىقپاۋى تيىستىگىن العا تارتتى. «قوعامنىڭ تۇتاستاي ەڭبەگى ءاربىر ازاماتقا ۇلەسىنە قاراي تەڭدەي بەرىلەتىن بولعاندا، ول مەملەكەت باقىتتى بولا باستايدى دەپ سانايمىن. بىزدە كەيبىرەۋلەر تاقىر جەردەن ميللياردەر بولىپ بايىپ شىعا كەلەدى. قايدان؟ قالايشا؟ بىزگە دامۋ باعىتىن بۇرىپ، باستى نازاردى ادامعا، ونىڭ جايلى ومىرىنە اۋدارۋ قاجەت. قوعامعا تيەسىلىنىڭ ءبارى سول قوعامداعى ازاماتتاردىڭ بارىنە دە تيەسىلى بولۋى كەرەك»، - دەدى ۆ. كوساريەۆ.
كوممۋنيستەر وكىلىنىڭ ايتۋىنشا، ەكونوميكانىڭ بارلىق سەكتورىنداعى ەڭبەكتىڭ جوعارى ونىمدىلىگى تۇراقتىلىقتى، ەل ەكونوميكاسىنىڭ ءوسىمىن تولىققاندى قامتاماسىز ەتەدى.
«حالىقتىڭ يگىلىگى قاراپايىم حالىقتىڭ ءوز قولىندا بولۋى ءتيىس. شەتەلدىك كاپيتاليستەر ولارعا قوجايىندىق ەتپەۋى ءۇشىن، ءبىزدىڭ ۇلتتىق بايلىعىمىزعا اۋىز سالماسى ءۇشىن قوعام مەن مەملەكەتتىڭ تۇتاستاي قاجىرلى ەڭبەگى كەرەك. ەڭبەك ارقىلى وندىرىلگەن ءاربىر تاۋار ءبىزدىڭ بارلىق ازاماتتارىمىزعا، ءتىپتى تابىسى از ازاماتتارعا دا قولجەتىمدى بولۋى شارت. سوندىقتان دا، ءبىز ەكونوميكانى كوممۋنيستىك قاعيداتقا سۇيەنە وتىرىپ، ياعني ەڭبەگىنە قاراي كوتەرمەلەۋ قاعيداتىنا سۇيەنە وتىرىپ قالىپتاستىرۋعا شاقىرامىز»، - دەدى ۆ. كوساريەۆ.
