تەلەسايىس بارىسىندا «اق جول» پارتياسىنىڭ ءتوراعاسى ا. پەرۋاشيەۆ ءوز كوزقاراسىن ءبىلدىردى

 استانا. قازاقپارات - بۇگىن ق ر پارلامەنتى ءماجىلىسىنىڭ سايلاۋىنا قاتىساتىن ەلىمىزدەگى التى ساياسي پارتيا وكىلدەرى اراسىنداعى تەلەسايىس بارىسىندا «اق جول» پارتياسىنىڭ ءتوراعاسى ازات پەرۋاشيەۆ ءوز كوزقاراسىن ءبىلدىردى.

  «قۇرمەتتى ارىپتەستەر، قۇرمەتتى سايلاۋشىلار! بۇگىنگى كۇنى الەمدەگى داعدارىس اياسىندا ورىن الىپ وتىرعان جاعدايدىڭ ءبىر سەبەبى بۇل - مۇناي مەن جالپى شيكىزات رەسۋرستارىنا باعانىڭ قۇلدىراۋى. ال وسىنداي جاعدايدان شىعۋدىڭ بىردەن- ءبىر جولى وتاندىق وندىرۋشىلەردى قولداۋ بولىپ تابىلادى. سوندىقتان دا، ءبىز ءۇشىن دە بىردەن- ءبىر جول تەك شيكىزات رەسۋرستارىنا، تابيعي بايلىقتارعا قاراماي، ءوزىمىزدىڭ ءونىمدى شىعارۋ. وكىنىشكە قاراي، قازىر قياردان ءىش كيىمگە دەيىن قازاقستانعا شەتەلدەن اكەلىنەدى»، - دەدى ا. پەرۋاشيەۆ.

«اق جول» پارتياسى باسشىسىنىڭ ايتۋىنشا، قازىرگى تاڭدا شيكىزاتقا تاۋەلدىلىكتەن كەتىپ، ءوزىمىزدىڭ تۇتىنۋشىلىق جانە باسقا دا تاۋارلاردى دامىتۋعا كۇش سالاتىن كەز جەتتى. «ال بۇل ءۇشىن ەڭ ءبىرىنشى كەزەكتە وتاندىق وندىرۋشىلەردى قولداۋ قاجەت»، - دەدى ول.

 ەسكە سالايىق، ساياسي پارتيالار وكىلدەرىنىڭ سايىسىنا «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆ، ق ح ك پ ۆلاديسلاۆ كوساريەۆ، «اۋىل» پارتياسىنان ءالي بەكتايەۆ، «اق جول» پارتياسىنان ازات پەرۋاشيەۆ، «بىرلىك» پارتياسىنان روزا قۋانىشبايەۆا، ج س د پ زاۋرەش باتتالوۆا قاتىستى.

 پىكىرسايىس «حابار» ارناسى ارقىلى كورسەتىلەدى دەپ جوسپارلانعان.

اۆتور: قانات مامەتقازى ۇلى