اتى شۋلى تالعات ەرمەگيايەۆتىڭ سوتى وتەتىن كۇن بەلگىلى بولدى
«ەكسپونىڭ» ەكس-ءتوراعاسى الداعى جۇما كۇنى، ياعني ناۋرىزدىڭ 18 ىندە سوت الدىندا جاۋاپ بەرەدى. كۇللى ەلدىڭ نازارى اۋعان پروتسەسستە ميللياردتار اينالعان ۇلتتىق كومپانياداعى ءبىراز بىلىقتىڭ بەتى اشىلاتىن ءتۇرى بار.
بىلتىر ماۋسىم ايىنان بەرى ەسىلدىڭ سول جاعالاۋىنداعى پەنتحاۋستا ءۇي قاماقتا وتىرعان ەرمەگيايەۆقا تاعىلعان ايىپتىڭ اۋقىمدىلىعى سونشا، قىلمىستىق ىسپەن تانىسۋعا 8 اي ۋاقىت كەتكەن. وعان حالىقارالىق كورمە قۇرىلىسىنا بولىنگەن 4 ميلليارد 200 ميلليون تەڭگەنى ۇرلادى دەگەن ايىپ تاعىلىپ وتىر.
تەرگەۋ ماتەريالدارىنا قاراعاندا «استانا ەكسپو-2017» ۇلتتىق كومپانياسىنىڭ بۇرىنعى ءتوراعاسى تالعات ەرمەگيايەۆ ءوزىنىڭ كەڭەسشىسى قاجىمۇرات ۇسەنوۆ جانە باسقارۋشى ديرەكتور سۋلامبەك باركينحويەۆپەن بىرىگىپ، اقشا جىمقىرعان. توپ-مەنەدجەرلەر قازىنا اقشاسىن وزدەرىنە تيەسىلى كومپانيالاردىڭ ەسەپشوتىنا اۋدارىپ، قولما-قول شەشىپ الىپ وتىرىپتى.
ەرمەگيايەۆپەن اۋىز جالاسقان بۇل ەكەۋدىڭ دە ىستەرى سوتقا جەتتى. ءبىراق ميللياردتتاپ اقشا جەدى دەپ كۇدىككە ىلىنگەندەردىڭ بىردە-ءبىرى كىناسىن مويىنداپ وتىرعان جوق.
