مۇحاممەد ءاليدىڭ قىزىنا ايتقان وسيەتى

استانا. قازاقپارات - ايگىلى بوكىشى مۇحاممەد ءاليدىڭ قىزى حاننا ءاليدىڭ اكەسىنە كىتاپ ارناعانىن بىلەمىز.

حاننا كەزەكتى جازباسىندا اشىق- شاشىق كيىنىپ اكەسىنە بارعان كەزدەگى وقيعانى تومەندەگىدەي باياندايدى: «ءبىز ۇيگە كەلىسىمەن، جۇرگىزۋشى كىسى مەنى جانە مەنىڭ كىشى ءسىڭىلىم لەيلانى اكەمنىڭ بولمەسىنە الىپ كىردى. ادەتتەگىدەي ول ەسىك ارتىنا تىعىلىپ، بىزگە توسىن سىي جاسادى. كورە سالىسىمەن قۇشاقتاسىپ، ءسۇيىپ جاتتىق. سودان كەيىن اكەم ماعان مۇقيات قارادى. از ۋاقىتتان كەيىن تىزەسىنە وتىرعىزىپ، ءومىر بويى ۇمىتپايتىنداي مىنا سوزدەردى ايتتى: «حاننا، اللا تاعالانىڭ جاراتقان بارلىق قۇندى زاتتارى جاسىرىن جانە قولجەتىمسىز كەلەدى. ايتشى، بريلليانتتى قايدان تابۋعا بولادى؟ ابدەن قورعالعان، مىقتى پاناسى بار جەردىڭ قويناۋىنان. ال گاۋھاردى قايدان تابۋعا بولادى؟ تەرەڭدە، مۇحيتتىڭ تۇبىندە، جابىلعان جانە قورعالعان ادەمى قابىرشاقتىڭ ىشىنەن. التىندى قايدان تابۋعا بولادى؟ جەردىڭ ميلليونداعان قاباتتارىمەن جانە تاستارمەن جابىلعان شاحتادان. ولارعا جەتۋ ءۇشىن اۋىر جۇمىستار جاساۋعا تۋرا كەلەدى...» وسىدان كەيىن سالماقتى كەيىپپەن تاعى دا قارادى: «ال سەنىڭ ءتانىڭ - قاسيەتتى. سەن بريلليانت پەن گاۋھاردان دا قۇندى ءارى باعالىسىڭ جانە سول سەكىلدى جابۋلى بولۋ كەرەكسىڭ» دەدى.

 

اسقار ايداروۆتىڭ پاراقشاسىنان