حيرۋرگتەر «جىگىتتەر» كۆارتەتىنىڭ مۇشەسى باعلاننىڭ قولىن كەسىپ تاستاماق بولعان
بۇل تۋرالى اناسى نۇرسۇلۋ حانىم «انالار» باعدارلاماسىندا بايانداپ بەردى، - دەپ جازادى stan.kz.
جىگىتتەر كۆارتەتىنىڭ اسا سابىرلى مىنەزىمەن، وزىنە ءتان ەرەكشە داۋسىمەن ءتانتى ەتكەن ءانشى جاستايىنان سوتقار بولىپ وسكەن ەكەن. ءتىپتى ءانشى ەمەس، مينيستر بولۋدى ارمانداعان.
اتا-اناسىنىڭ باعلاننىڭ الدىندا بەيبىت ەسىمدى ۇلدارى بولعان. الايدا ءبىر جارىم جاسقا كەلگەن سوڭ شەتىنەپ كەتەدى. اناسى ەكىنشى رەت ۇل بالانى دۇنيەگە اكەلگەن كەزدە قاتتى قۋانعانىن جاسىرمادى. ءسابيى تەك قۋانىش سىيلاپ قويماي، مۇڭايتقان ساتتەرى دە بولىپتى. بۇل باستاپقى ەكى ايدا موينىن جەلكەگە قاراي تارتىپ، توقتاۋسىز جىلاي بەرەتىندىگىمەن بايلانىستى بولسا كەرەك. ونى تاۋىپكە الىپ بارىپ ەمدەتۋگە ءماجبۇر بولعان ەكەن.
ءاندى جاقسى ايتاتىن اناسى روزا باعلانوۆا، بيبىگۇل تولەگەنوۆا سىندى انشىلەردى ءسۇيىپ تىڭداعان. ءتىپتى بالاسىنىڭ ەسىمىن وسى انشىلەرمەن بايلانىستىرعان.
«ءوزىم ويلايتىنمىن دۇنيەگە ەر بالا اكەلسەم، سولاردىڭ بىرەۋىنىڭ ەسىمىن باعلان قويامىن دەپ. روزا باعلانوۆا دەگەندەگى باعلانوۆا دەگەن فاميليا ماعان ۇنايتىن. سونى ويلاپ اتىن باعلان قويدىم»، - دەگەن اناسى جالعىز ۇلىنىڭ ەسىمىن ءوزى قويعان ەكەن.
«بايقاپ وتىرساڭىزدار، سول قولىنداعى ساۋساقتارىندا تىرتىق ىزدەر بار. اۋىلداستىڭ ۇيىندە انتەننا سۆاركىلەپ جاتقاندا ويناپ ءجۇرىپ، اينالىپ تۇرعان تراكتوردىڭ ۆەنتەلياتورىن ۇستاپ، قولىن تۋراپ العان. اۋەلى قۇداي، ەكىنشى ورمانوۆ نۇرعالي دەگەن اعامىز. اۋداندىق اۋرۋحانانىڭ باس دارىگەرى حيرۋرگتار قولىن كەسەمىز دەپ، بىلەگىنەن تومەن قاراي كەسىپ تاستاماقشى بولدى. الگى اعامىز كەستىرمەي «قالاي دا بولسىن وسى ساۋساقتى جالعاپ قولىن ورنىنا جالعاپ بەرەسىڭدەر» دەدى»، - دەپ بۇگىنگى تاڭدا دومبىرانى شەبەر تارتىپ جۇرگەن قولدان ءبىر كەزدەرى ايىرىلىپ قالۋى مۇمكىن بولعان جاعدايدى باياندادى.
«ءبىر بالاسى باردىڭ شىعار جانى بار» دەمەكشى، انا جۇرەك بالاسى ءۇشىن ۇنەمى ۋايىمداپ جۇرەدى ەكەن.
