ن. نازاربايەۆ ءبىرقاتار شەتەل ەلشىسىنەن سەنىم گراموتاسىن قابىلدادى
اتاپ ايتقاندا، ق ر پرەزيدەنتىنە سەنىم گراموتاسىن ب ۇ ۇ دامۋ باعدارلاماسىنىڭ قازاقستانداعى تۇراقتى وكىلى، ب ۇ ۇ- نىڭ تۇراقتى ۇيلەستىرۋشىسى نوريماسا شيمومۋرا، يزرايل ەلشىسى ميحايل برودسكي، وزبەكستان ەلشىسى يكروم نازاروۆ، ازەربايجان ەلشىسى راشاد ماممادوۆ، تايلاند ەلشىسى نات پينوۆاتتاناچيپ تابىس ەتتى.
«سىزدەرمەن بۇگىن اقوردادا جۇزدەسكەنىمە قۋانىشتىمىن. بۇگىنگى سەنىم گراموتاسىن تاپسىرۋ ءراسىمى ءارقايسىڭىزدىڭ دەربەس ديپلوماتيالىق تاريحتارىڭىزداعى جاڭا بەلەسكە اينالاتىن بولادى. ءبارىڭىز دە ديپلوماتيالىق ميسسياعا العاش رەت باسشىلىق ەتكەلى وتىرسىزدار. قىزمەتتەرىڭىزدىڭ جاڭا كەزەڭى قازاقستاننان باستالادى. سىزدەردى قۇتتىقتاي وتىرىپ، قازاقستانداعى جاۋاپتى جانە مارتەبەلى ميسسيالارىڭىز ەلدەرىمىز اراسىنداعى ىنتىماقتاستىقتى جان-جاقتى دامىتۋعا سەپتىگىن تيگىزەدى دەپ سەنەمىن»، - دەدى مەملەكەت باسشىسى.
سونىمەن قاتار ەلباسى ەلشىلەردىڭ ديپلوماتيالىق قىزمەتتەرىنىڭ جاڭا كەزەڭى قازاقستان ءۇشىن ماڭىزدى داتا - تاۋەلسىزدىكتىڭ 25 جىلدىعى قارساڭىندا باستالعالى وتىرعانىن باسا ايتتى.
«بۇل تاريحي تۇرعىدا قىسقا كەزەڭ ءبىزدىڭ ەلىمىز ءۇشىن اۋقىمدى وزگەرىستەردىڭ داۋىرىنە اينالدى. مەملەكەتتى نىعايتۋ، زاماناۋي نارىقتىق ەكونوميكا قۇرۋ، قوعامدى جاڭعىرتۋ جونىندە وراسان زور جۇمىس اتقارىلعانىن بىلەسىزدەر. بۇگىندە ءبىزدىڭ ەلدىڭ باستى سيپاتتارى - ساياسي تۇراقتىلىق، ەتنوسارالىق جانە كونفەسسياارالىق كەلىسىم، حالىقارالىق ىستەردەگى سەنىمدىلىك پەن جاۋاپتىلىق، ءتيىمدى الەۋمەتتىك-ەكونوميكالىق وزگەرىستەر»، - دەدى ن. نازاربايەۆ.
اۆتور: مارلان جيەمباي
