باتىس قازاقستاندىق بايقاۋشىلار سايلاۋعا دايىن
بۇل تۋرالى ورتالىق كوممۋنيكاتسيالار قىزمەتى وڭىرلىك فيليالىندا سايلاۋدى باقىلاۋ جونىندەگى رەسپۋبليكالىق قوعامدىق كوميسسيا وڭىرلىك ورتالىعىنىڭ جەتەكشىسى ۆەرا شوحينا ءمالىم ەتتى.
ونىڭ ايتۋىنشا، شتاب مۇشەلەرى بارلىق 520 سايلاۋ ۋچاسكەسىنە باراتىن بايقاۋشىلاردى ىرىكتەپ الدى. ولارمەن كەلىسىمشارت جاسالىپ، سەمينار-ترەنينگتەر وتكىزىلدى، بايقاۋشى كۋالىكتەرى تابىس ەتىلدى. بايقاۋشىلار اراسىندا ينستيتۋت وقىتۋشىلارى مەن مەكتەپ مۇعالىمدەرىنەن باستاپ زەينەتكەرلەرگە دەيىن بار. بايقاۋشى بولامىن دەۋشىلەرگە شەكتەۋ قويىلعان جوق. بارلىق تالاپقا ساي كەلگەندەرى بايقاۋشى رەتىندە ىسكە كىرىستى. ولارعا سول قىزمەتى ءۇشىن اقى دا تولەنەدى.
«بايقاۋشىلاردىڭ باستى مىندەتى - سايلاۋ بولاتىن كۇنى ءوز ۋچاسكەسىندەگى داۋىس بەرۋ بارىسىن باستان-اياق باقىلاۋ. سونىمەن بىرگە ولار ودان بۇرىن سايلاۋ ۋچاسكەلەرىنە بارىپ، جۇمىستارىمەن تانىسىپ، كانديداتتار مەن سايلاۋشىلاردىڭ قۇقىعى بۇزىلماۋىن قاداعالايدى. زاڭبۇزۋشىلىق بولا قالعان جاعدايدا سول بويدا شتابقا حابارلاسادى. ءارى قاراي ءتيىستى شارا الىنادى»، دەدى ۆ. شوحينا.
اۆتور: ەلجان ەرالى
