ەلباسى ر. ەردوعانعا جانە تۇركيا حالقىنا انكاراداعى تەررورلىق اكتىگە بايلانىستى كوڭىل ايتتى

 استانا. قازاقپارات - ەلباسى نۇرسۇلتان نازاربايەۆ تۇركيا رەسپۋبليكاسىنىڭ پرەزيدەنتى رەجەپ تايپ ەردوعانعا انكارا قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى.

  بۇل تۋرالى اقوردانىڭ باسپا ءسوز قىزمەتىنەن حابارلادى.

جەدەلحاتتا قايعىلى وقيعا سالدارىنان كوپتەگەن جازىقسىز ادامداردىڭ قازا بولعانى جانە زارداپ شەككەنى تۋرالى حاباردى قازاقستان پرەزيدەنتى زور كۇيزەلىسپەن قابىلداعانى اتاپ وتىلگەن.

«ەلىڭىزبەن كورشى ايماقتاعى تۇراقسىزدىق پەن حالىقارالىق تەرروريزمنىڭ ورشۋىنە قاراماستان، تۇركيا ىشكى تۇراقتىلىعى مەن قاۋىپسىزدىگىن نىعايتىپ، قازىرگى زامان قاۋىپ- قاتەرلەرىنە قارسى كۇرەستە تاباندىلىق تانىتاتىنىنا سەنىمدىمىن. حالىقارالىق تەرروريزمنىڭ تامىرىنا بالتا شابۋ الەمدىك قوعامداستىق الدىندا تۇرعان ەڭ وزەكتى مىندەت دەپ سانايمىن»، - دەلىنگەن جەدەلحاتتا.

مەملەكەت باسشىسى قازاقستان 21 - عاسىردىڭ ەڭ قاۋىپتى قاتەرىنە قارسى كۇرەستە باۋىرلاس تۇرىك حالقىن قولدايتىنىن اتاپ ايتتى.

سوڭىندا نۇرسۇلتان نازاربايەۆ قازاقستان حالقىنىڭ جانە جەكە ءوزىنىڭ اتىنان ر. ەردوعانعا، قازا تاپقانداردىڭ تۋىس- تۋعاندارىنا، سونداي- اق بارشا تۇركيا حالقىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىگىن ءبىلدىردى.