قابانباي باتىردىڭ قىزى كىم؟

نۇر- سۇلتان. قازاقپارات - نازىم - قازاقتىڭ ەر جۇرەك باتىر قىزدارىنىڭ ءبىرى. قابانباي باتىر مەن ونىڭ جارى، قازاقتىڭ باتىر قىزى گاۋحاردان تۋعان.

اكەسىمەن بىرگە XVIII عاسىردا قازاق-جوڭعار سوعىسىنا قاتىسىپ، وتانىن قورعاعان. نازىم قىز ەسىمى جۇرتقا اڭىز بولىپ تاراعان، دەپ جازادى massaget.kz.

XVIII عاسىردىڭ ورتاسىنا قاراي (1745-جىل) جوڭعار قونتايشىسى قالدان سەرەن ءولىپ، جوڭعارلاردىڭ ءوز ىشىندە تاق تالاسى باستالادى. وسى جاعدايدى ۇتىمدى پايدالانعان ابىلاي تۇركىستان مەن سىر بويىنداعى قالالاردى ازات ەتۋدى الدىنا ماقسات ەتىپ قويادى.

ابىلاي سول جورىقتاردىڭ بىرىندە قازاق اسكەرلەرىن ءۇش توپقا بولەدى. ونىڭ ءبىرىنشى توبىن قانجىعالى بوگەنباي باسقارادى. ول سوزاق بەكىنىسىنە بارىپ بەكىنۋگە ءتيىس بولادى. ەكىنشى قولدى جانىبەك باتىر باسقارادى. ول سىرداريانىڭ تومەنگى ساعاسىنا قاراي بەت تۇزەيدى.

ءۇشىنشى نەگىزگى قولدى ابىلايدىڭ ءوزى باسقارادى. جوڭعارلار تاراپىنان قالدان سەرەننىڭ ورتانشى ۇلى، تاق مۇراگەرى بولعان سيەۆەن دورجى شىعادى. ول ءوزىنىڭ اۋىر قولىمەن ابىلاي اسكەرلەرىنەن بۇرىن كەلىپ، بەكىنىپ الادى. ابىلاي جاڭاقورعاندى الۋدى قابانبايعا تاپسىرادى. زەڭبىرەك ولارعا قارسى وق جاۋدىرىپ، جۇزدەگەن سارباز قىرىلادى. امالسىز ابىلايدىڭ قولى كەيىن شەگىنەدى.

قانداي ارەكەت جاسارىن بىلمەي ابدىراپ تۇرعاندا، قازاق جاساقتارىنىڭ وڭ جاق تۇسىنان سيەۆەن دورجى تۇرعان توبەگە قاراي باسىندا ۇكىلى كامشات بوركى بار، اق بوز اتتى ءبىر قىز بالا «قابانباي! قابانباي!» دەپ ۇران تاستاپ، سۋىرىلىپ شىعادى.

قىزدىڭ قولىندا نە نايزا، نە سويىلى جوق، بار بولعانى قامشى عانا. مۇنى كورگەن قالىڭ قول شىداي الماي لاپ قويىپ، «ابىلاي! اق جول! قابانباي! ابىلاي!» دەپ ايقايلاپ، زەڭبىرەكشىلەردىڭ تۇيەسىن تاپتاپ وتەدى. سيەۆەن دورجىنىڭ قولىن تالقانداپ، جەڭىسپەن ورالعان ابىلاي ماناعى قالماقتارعا قارسى شاۋىپ، جەڭىسكە جول سالعان قىزدى ىزدەستىرەدى.

بۇل قابانباي باتىر مەن ونىڭ زايىبى، قازاقتىڭ باتىر قىزى گاۋحاردان تۋعان جاس نازىم ەكەن. بۇلدىرشىندەي قىزدىڭ وسىنشاما ەرلىگىنە ءدان ريزا بولعان ابىلاي بەلىندەگى سوم التىننان سوعىلعان بەلبەۋىن شەشىپ، قىزعا سىيلاپتى. ابىلايدىڭ جوڭعارلاردى تولىق تالقانداۋىنا جول سالعان جەڭىسى سول نازىمنىڭ اتىمەن بايلانىستى بولعان.