ا. بايمەنوۆ قازاقستاننىڭ مەملەكەتتىك ورگاندارىنا شەتەل ازاماتتارىنىڭ قىزمەتكە كەلۋى مۇمكىن ەكەندىگىن ايتتى
دەگەنمەن ول شەتەل ازاماتتارىنىڭ باسقارۋشى لاۋازىمدارعا تاعايىندالۋى ەكىتالاي ەكەنىن دە جەتكىزدى.
«مەنىڭشە، ءبىزدىڭ ەلدە ۋكرايناداعىداي شەتەلدىك ازاماتتار ءبىرىنشى باسقارۋشىلىق لاۋازىمدارعا تاعايىندالا قوياتىنىنا كۇمانىم بار. ونىڭ قاجەتتىلىگى دە شامالى. ءبىراق جەكەلەگەن سالالاردا شەتەلدىك ساراپشىلار تارتىلادى. الايدا ولار ءبىزدىڭ ۇلتتىق مۇددەلەرىمىزگە ساي، ءتيىستى قىزمەتتەرمەن تەكسەرىلگەننەن كەيىن، تەك كادر ساياساتى جونىندەگى ۇلتتىق كوميسسيانىڭ ۇسىنۋىمەن عانا جۇمىسقا قابىلدانا الادى. بۇل نورما «مەملەكەتتىك قىزمەت تۋرالى» جاڭا زاڭدا كورسەتىلگەن»، - دەپ اتاپ ءوتتى ول استانادا وتكەن «مەملەكەتتىك قىزمەتتەگى زاماناۋي ۇردىستەر مەن رەفورمالار» اتتى كونفەرەنسيادا.
«كەيبىر مەملەكەتتەردىڭ ۇلكەن جەتىستىككە جەتكەن جەكەلەگەن باعىتتارى بار. مەنىڭشە، ەگەر سول ەلدەردىڭ ساراپشىلارى ءوز بىلىمىمەن بولىسەر بولسا، بۇل قازاقستان دامۋىنا ۇلكەن سەرپىن بەرەر ەدى»، - دەيدى ءا. بايمەنوۆ.
اۆتور: جاسۇلان جولدىبايەۆ
