ايبەك نۇرسەيىت: عابيتتىڭ ماعان قولى باتپاي تۇرعانىن بىردەن بايقادىم
ول سپورتشىلاردىڭ ءبىرى ازاتتىققا بەرگەن سۇحباتىندا قارسىلاسىمەن نەلىكتەن كۇش سىناسپاعانىن ءتۇسىندىردى.
سوڭعى كۇندەرى الەۋمەتتىك جەلىلەردىڭ قازاقستاندىق قولدانۋشىلارى قازاق ۇلتىنان شىققان ەكى سپورتشىنىڭ سايىسى تۋرالى ۆيدەونى ءبىر- بىرىمەن ءبولىسىپ، قىزۋ تالقىلاسىپ جاتىر.
ول ۆيدەودا ەرەجەسىز جەكپە- جەكتىڭ WBK تۇجىرىمى بويىنشا قىتايدا وتكەن جارىستىڭ فينالىندا رينگكە شىققان قازاقستاندىق ايبەك نۇرسەيىت پەن قىتايلىق عابيت تۇرعانبەكتىڭ جەكپە- جەگى تۇسىرىلگەن.
بەس مينۋتقا سوزىلعان جەكپە- جەكتەن كەيىن تورەشى بەلسەندى قيمىلداماي قويعان ەكى سپورتشىعا دا «سپورتتىق ەرەجەگە ساي توبەلەسپەگەنى» ءۇشىن قىزىل قاعاز بەرىپ، ناتيجەلەرىن ەسەپتەمەي تاستاعان.
ايبەك پەن عابيتتىڭ سايىسىن «ەكەۋى دە قازاق بولعاندىقتان ءبىر- ءبىرىن ۇرا المادى» دەپ ريزالىقپەن تۇسىندىرۋشىلەر دە، «ولاردىڭ مۇنداي ارەكەتى سپورتقا جات قىلىق» دەپ سوككەندەر دە بولدى.
قازاقستاندىق سپورتشى ايبەك نۇرسەيىت ازاتتىققا بەرگەن سۇحباتىندا بۇل جارىس تۋرالى، عابيت تۇرعانبەكپەن رينگكە شىققان كەزدەگى ارەكەتى جايلى ايتتى.
ازاتتىق: - الەۋمەتتىك جەلىدە تاراعان ۆيدەودا بەينەلەنگەن جارىس قاي كەزدە ءوتىپ ەدى؟
ايبەك نۇرسەيىت: - جارىس 5 -ناۋرىزدا شاڭحاي ماڭىنداعى شاعىن قالادا ءوتتى. بۇل جارىسقا بارۋ مەنىڭ جوسپارىمدا بولماعان. بەس-التى كۇن قالعاندا جارىسقا بارۋى ءتيىس سپورتشىلاردىڭ ءبىرى قاتىسپايتىنىن ايتىپ، ونىڭ ورنىنا مەن باراتىن بولدىم. 70 كيلوگرام سالماقتا ءتورت ادام شىقتىق. مەن فرانسيالىق مايكل دۋبويستى، قىتايلىق قازاق عابيت تۇرعانبەك ۋكراينالىق سپورتشىنى جەڭدى. وسىلايشا ەكەۋمىز فينالعا شىقتىق. عابيت ەكەۋمىز ءبىر-ءبىرىمىزدى تانيمىز. ول الماتىعا كەلىپ، ءبىر ايداي بىزبەن بىرگە جاتتىعۋ جاساپ كەتكەن.
ازاتتىق: - عابيت ەكەۋلەرىڭىزدى «فينالدا سپورتتىق ەرەجەگە ساي جەكپە-جەك وتكىزبەي، جۇدىرىقتاسپاي ءجۇرىپ الدى» دەپ سىناعان وقىرماندار دا بار؟ وعان قانداي جاۋاپ ايتار ەدىڭىز؟
ايبەك نۇرسەيىت: - نەگىزى مەن فينالعا شىعامىن دەپ ويلاعان جوقپىن. باستى ماقساتىم فرانسيالىق قارسىلاسىمدى جەڭۋ بولدى. عابيت ەكەۋمىز ءبىر-ءبىرىمىزدى جارىس الدىندا سالماق ولشەۋ ساتىندە كوردىك. ءبىراق جەكپە-جەك الدىندا «ءبىر- بىرىمىزگە جۇدىرىق جۇمسامايمىز» دەگەن سياقتى كەلىسىم بولعان جوق. كەلىسىم بولسا، جەكپە-جەككە شىقپاس ەدىك. فينالدىق جەكپە-جەككە مەن دە، عابيت تە قازاق انىمەن شىقتىق.
الاڭعا شىققان سوڭ عابيت سوققى جاساماي ءجۇردى. عابيتتىڭ ماعان قولى باتپاي تۇرعانىن بىردەن بايقادىم دا، مەن دە شابۋىلعا شىقپادىم. قىتاي كورەرمەننىڭ الدىندا قوس قازاق ءبىر-ءبىرىنىڭ مۇرنىن قاناتىپ، كوزىن شىعارىپ جاتۋ جاراسپايدى دەگەن نامىس بولدى. قانشا اقشا بەرىپ جاتسا دا، قازاق ەكەنىمىزدى دالەلدەگىمىز كەلدى. جەكپە-جەكتەن كەيىن عابيت ەكەۋمىز ارنايى بانكەتتە جولىعىپ، قول الىستىق.
ازاتتىق: - ەكەۋىڭىز قىزىل قاعاز الىپ، جارىستان شەتتەتىلگەن سوڭ جۇلدە كىمگە بەرىلدى؟
ايبەك نۇرسەيىت: - جارىستا ارنايى چەمپيوندىق بەلبەۋ مەن قوماقتى قارجى ساراپقا سالىنعان. ءبىراق ول ەشكىمگە بەرىلمەدى. ۇيىمداستىرۋشىلار مەنىڭ فرانسۋزبەن وتكىزگەن جەكپە-جەگىمدى كورىپ، الداعى جارىستارعا شىعۋىما مۇمكىندىك بەردى. عابيتكە قاتىستى قانداي شەشىم شىعارعانىن الداعى كۇندەرى بىلەمىز. كەلەسى جارىس مامىردا تالدىقورعاندا وتەدى. ءبىراق WBK تۇجىرىمىنىڭ پرەزيدەنتى ول جارىستا مەنى قازاققا قارسى شىعارمايتىنىن ايتتى.
ازاتتىق: - اڭگىمەڭىزگە راقمەت.
