جاڭا ەرەجەنىڭ سالدارىنان قازاقستاندىقتارعا نەكەلەسۋ قيىنداي ءتۇستى

استانا. قازاقپارات - ا ح ا ج- دىڭ جاڭا جۇمىس كەستەسى نەكە قيعىسى كەلەتىندەردىڭ كوڭىلىنەن شىقپاي قالدى.

سەبەبى ەندى جاس جۇبايلار نەكەسىن تەك جۇمىس كۇندەرىندە عانا زاڭدى تۇردە قيا الادى. وسىنىڭ سالدارىنان كوپتەگەن تۇرعىندار تويلارىن بىرنەشە كۇنگە كەيىنگە شەگەرۋدە دەپ حابارلايدى 31- ارنا.

قوستاناي تۇرعىنى ۆيكتوريا سكوكوۆا مەن ونىڭ سۇيىكتىسى نەكەلەرىن سەنبى كۇنى قيۋدى جوسپارلاعان. الايدا نەكە سارايى دەمالىس كۇندەرى جۇمىس ىستەمەيتىنىن بىلگەن جاس جۇبايلاردىڭ كوڭىلى سۋ سەپكەندەي باسىلدى.

ادىلەت ءمينيسترىنىڭ 2015-جىلعى 17- ساۋىردەگى بۇيرىعىنا سايكەس، مەملەكەتتىك مەكەمە تەك جۇمىس كۇندەرى قىزمەت ەتەدى.

«نەكە قيۋ مەملەكەتتىك قىزمەتىنىڭ» ستاندارتى ادىلەت ءمينيسترىنىڭ 2015-جىلعى 17- ساۋىردەگى بۇيرىعىمەن بەكىتىلگەن، ءبىز وعان بىرتىندەپ وتۋگە بەل بۋدىق. نەگە؟ سەبەبى، كوكتەم، كۇز جانە جاز - ناعىز نەكە قيۋ ماۋسىمى. حالىق دۇرلىكپەۋى ءۇشىن قىستان باستاپ، وسى ەرەجەگە ساي قىزمەت كورسەتە باستادىق»، - دەيدى قوستاناي قالاسى نەكەنى تىركەۋ ءبولىمىنىڭ باسشىسى گۇلنار تۇركىبايەۆا.

ۆيكتوريانىڭ ايتۋىنشا، ەندى وعان نەكە قيۋ ءراسىمىن ارنايى قىزمەتتى شاقىرتۋمەن ۇيىمداستىرۋعا تۋرا كەلەدى.

ايتا كەتەرلىگى، ا ح ا ج دەمالىس كۇندەرى جۇمىس ىستەمەيتىندىكتەن، وسىنداي اقىلى قىزمەت كورسەتەتىندەرگە سۇرانىس ارتقان. ولاردىڭ قىزمەت قۇنى 30 مىڭنان 250 مىڭ تەڭگەگە دەيىن بارادى.

قازاقستانداعى ءبىرشاما نەكە سارايلارى جاڭا جۇمىس كەستەسىنە ءوتىپ ۇلگەرگەن. دەگەنمەن كەي قالالار، ماسەلەن قاراعاندى قالاسىنىڭ نەكە سارايى سەنبى كۇندەرى دە نەكە قيۋدى جالعاستىرۋدا. ولار دا كوپ ۇزاماي بەس كۇندىك جۇمىس كەستەسىنە ءوتۋى ابدەن مۇمكىن.