كافەدە ەمەس، كىتاپحانادا تانىسقان ەكى جاس - فوتو

استانا. قازاقپارات -  ۇلتتىق اكادەميالىق كىتاپحاناعا قىز بەن جىگىت كەلىپ، وزدەرىنىڭ «ماحاببات تاريحىنىڭ» ءبىر پاراعىن كىتاپحانامەن بايلانىستىرعىسى كەلەتىنىن ايتقان.

بۇل تۋرالى كىتاپحانانىڭ فەيسبۋك پاراقشاسى جاريالاپتى. اتالعان جاعداي جانىمىزعا ءبىر جىلىۋلىق سىيلاعانداي بولدى. ەكى جاس - استاناداعى س. سەيفۋللين اتىنداعى اگروتەحنيكالىق ۋنيۆەرسيتەتتىڭ ماگيسترانتى قۋانىشبەك ارالباي مەن ەۋرازيا ۇلتتىق ۋنيۆەرسيتەتىندە «جوعارى ماتەماتيكا» ماماندىعىن وقيتىن كاۋسار ەركىن قىزى.

ولار جاقىن ارادا ۇيلەنىپ، شاڭىراق كوتەرمەك. ەكەۋى راسىندا العاش رەت كىتاپحانادا تانىسقان. كافەدە، نە بولماسا تۇنگى كلۋبتا الدە توي- دۋماندا ەمەس، رۋحانياتتىڭ ۇياسى، اقىل- ويدىڭ قازىناسى تۇنعان كىتاپحانادا تانىسۋ ولاردى ارى قاراي كىرشىكسىز سەزىم الەمىنە جەتەلەپ، ماحاببات بەسىگىندە تەربەتكەن.

 ولار توي كەزىندە جيىلعان كوپكە كورسەتۋدى جوسپارلاعان «ماحاببات كەشىرمەلەرى» باياندالاتىن ۆيدەودا كىتاپحانادا تانىسقان ساتتەرىن كورسەتۋدى قالايدى.

 «ءبىز ءوزىمىزدىڭ كىتاپحانادا تانىسقانىمىزدى ماقتانىشپەن ەسكە الامىز. سەبەبى، قازىرگى جاستار كىتاپ وقۋدان الشاقتاپ بارادى. كىتاپحاناعا سيرەك باس سۇعادى. ءبىز ماحاببات تاريحىمىزدا ءوزىمىزدىڭ كىتاپحانادا العاش تانىسقان ءساتىمىزدى اسەرلى بەينەلەۋ ارقىلى كەيىنگى جاستارعا از دا بولسا ۇلگى ەتىپ، جان- دۇنيەنىڭ قالاۋىنان تۋاتىن ماحاببات سەزىمىنىڭ جانعا ازىق بەرەتىن كىتاپ، كىتاپحانامەن بايلانىسقاندا ءتىپتى دە اسقاقتاي تۇسەتىنىن كورسەتكىمىز كەلدى» دەيدى قۋانىشبەك پەن كاۋسار.

baq.kz