ەلباسى: ەل بىرلىگى - ەڭ اسىل قاسيەت - فوتو
ەلباسىنىڭ جيىندا اتاپ وتكەنىندەي، 2015 -جىلى قازاقستان حالقى اسسامبلەياسى جىلى اياسىندا بارلىق وڭىرلەردە ەل بىرلىگىن تانىتىپ، تاتۋ- ءتاتتى تىرلىگىن كورسەتەتىن شارالار ۇيىمداستىرىلدى. تاياۋدا العاش رەت اتاپ وتىلگەن العىس ايتۋ كۇنىندە دە وسىنداي شارالار جالعاسىن تاپتى. وزگە ۇلت وكىلدەرى كەزىندە قۇشاق جايىپ، قارسى العانى ءۇشىن قازاق حالقىنا ريزاشىلىعىن بىلدىرسە، قازاق حالقى دا قازىرگى تىنىشتىق سالتانات قۇرىپ وتىرعان ءومىرىمىز ءۇشىن العىسىن ايتتى.
ءبىز ءبارىمىز - ءبىر ەلدىڭ پەرزەنتىمىز. ورتاق وتانىمىز بار، تامىرىمىز ءبىر، بولاشاققا دا سەنىممەن قادام باسىپ كەلەمىز. بۇعان باتىس قازاقستان وبلىسىنىڭ تۇرعىندارى دا ءوز ۇلەستەرىن قوسۋدا. وڭىردە توقساننان استام ۇلت وكىلدەرى جاراسىمدى ءومىر كەشسە، 50 ۇلتتىق-مادەني ورتالىق جۇمىس جاساۋدا. قازىرگى كەزدە داعدارىس ماسەلەسىن دە بىرلىكتىڭ كۇشىمەن جەڭۋگە بولادى.
پرەزيدەنت ءوزىنىڭ تاپسىرمالارىنا سايكەس باتىس قازاقستان وبلىسىندا جاڭا ءوندىرىس ورىندارى قۇرىلىپ، شاعىن جانە ورتا بيزنەس نىساندارىنىڭ تىنىسى اشىلىپ وتىرعانىن، الىس اۋىلدارعا دەيىن جول سالىنىپ جاتقانىن، سونىمەن قاتار ەل الدىندا كوپ مىندەتتەر تۇرعاندىعىن، سونىڭ ىشىندە جاڭارۋ ايى بولىپ ەسەپتەلەتىن ناۋرىزدا وتەتىن ءماجىلىس پەن ءماسليحات دەپۋتاتتارىن سايلاۋعا ۇيىمشىلدىقپەن قاتىسۋدىڭ ماڭىزدىلىعىن اتاپ كورسەتتى.
«ەلىمىز امان، جۇرتىمىز تىنىش بولسىن. تاۋەلسىز ەل اتانىپ، بۇرىن- سوڭدى بولماعان، وزگەلەرمەن تەرەزەسى تەڭ مەملەكەت قۇردىق. دۇنيە ءجۇزى سىيلايتىن ەل اتاندىق. سونىڭ ءبارى - ءبىزدىڭ بىرلىگىمىزدىڭ ارقاسى. قازىرگى كەزدە جاستارىمىز ەلدىڭ ىشىندە دە، سىرتىندا دا كوپتەپ ءبىلىم الۋدا. ءبىزدىڭ بۋىننىڭ تىك تۇرىپ اتقارعان قىزمەتىن كەلەشەكتە سولار جالعاستىراتىن بولادى. ەلىمىز دامىپ، حالقىمىزدىڭ بەرەكە- بىرلىگى ارتا بەرسىن!» - دەدى ءسوزىنىڭ سوڭىندا مەملەكەت باسشىسى.
بۇدان كەيىن م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ فاكۋلتەت دەكانى مەيرام يساتايەۆ، الماتى قالاسىنان كەلگەن نارينە ميكاەليان، اقتوبەلىك يرينا دولتسيەۆا، قىزىلوردالىق ناتاليا جۇمادىلدايەۆا، بقو ورىس مادەنيەتى ورتالىعىنىڭ ءتوراعاسى سەرگەي پوگودين قازاق ەلىندە ۇلتارالىق كەلىسىم سالتانات قۇرىپ وتىرعانى ءۇشىن ەلباسىنا شىنايى ريزاشىلىقتارىن ءبىلدىردى. «ماڭگىلىك ەل» يدەياسى جولىندا ءبارىمىز بىرگە العا باسا بەرەتىن بولامىز» دەدى ولار.
ايتا كەتەيىك، بۇل شاراعا قۇرامىندا قازاقستان حالقى اسسامبلەياسى، رەسپۋبليكالىق جانە وڭىرلىك ەتنومادەني بىرلەستىكتەر مۇشەلەرى، عىلىمي جانە شىعارماشىل زيالى قاۋىم، جاستار وكىلدەرى بار ءۇش مىڭداي ادام جينالدى.
فورۋم بارىسىندا ەتنومادەني بىرلەستىكتەردىڭ شىعارماشىلىق ۇجىمدارى مەرەكەلىك كونسەرت قويدى.
اۆتور: ەلجان ەرالى
