تۇركيادا «قازاق ەلى» باسىلىمى جارىق كوردى - فوتو
«قازاق- تۇرىك ءبىلىم جانە زەرتتەۋ قاۋىمداستىعىنىڭ باستاماسىمەن جارىق كورگەن «قازاق ەلى» اتتى جۋرنالىمىز قازاق جانە تۇركى الەمىنە پايدالى بولۋىنا تىلەكتەسپىن. جارىق كورگەن جۋرنالىمىزدا قاۋىمداستىعىمىزدىڭ ءىس- شارالارىن قوعامدىق ومىردە بولىپ جاتقان جاڭالىقتارىن قۇرمەتتى وقىرماندارعا جەتكىزىپ، ارامىزداعى جەتىستىكتەردى تانىستىرا وتىرىپ، مادەنيەتىمىزدەن دە ۇزىندىلەر ۇسىنامىز. تۇرىك الەمىندە بولىپ جاتقان كۇندەلىكتى جاڭالىقتاردى زەرتتەي وتىرىپ، سىزدەرگە جەتكىزۋگە تىرىسامىز» ، - دەدى قازاق- تۇرىك ءبىلىم جانە زەرتتەۋ قاۋىمداستىعىنىڭ پرەزيدەنتتى سەركان دىنشتۇرىك.
جۋرنالدىڭ العاشقى سانىندا ەۋرازيا ۋنيۆەرسيتەتىنىڭ جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى نامازالى وماشيەۆتىڭ «قازاق ەلى» ، قازاقستاننىڭ تۇركياداعى ەلشىسى جانسەيىت تۇيمەبايەۆتىڭ قازاقستان مەن تۇركيانىڭ بايلانىستارى تۋرالى، قازاق- تۇرىك ءبىلىم جانە زەرتتەۋ قاۋىمداستىعىنىڭ قۇرمەتتى ءتوراعاسى ياكۋپ جاننىڭ «ماقساتىمىز قازاق ەلىنە لايىقتى جاستار تاربيەلەۋ» ، ەۋرازيا تۇرىك قاۋىمداستىعى فەدەرەراتسياسىنىڭ ءتوراعاسى يسمايل جەنگيزدىڭ «تۇركى الەمىنىڭ جارقىن كەلەشەگى» ، حىزىربەك گايرەتتۋلاحتىڭ «كوش» ، قۇددۋس چولپاننىڭ «زۋقا باتىر» ، ەرلىك ەرجان ۇلىنىڭ «وسىمدىكتەردىڭ ءتول اتاۋىن قالپىنا كەلتىرۋگە بولا ما؟ » دەگەن ماقالالارى جاريالاندى.
دۇنيەجۇزى قازاقتارى قاۋىمداستىعىنان حابارلاعانداي، جاڭا باسىلىمدى تۇركياداعى قازاق تۇرىكتەرى ءبىلىم جانە زەرتتەۋ قاۋىمداستىعى شىعارىپ وتىر. جىل سايىن اتالعان قاۋىمداستىق ەڭ از دەگەندە 25 ستۋدەنتكە شاكىرتاقى تاعايىنداپ وتىر.
سونداي- اق، قازاق زيالىلارى مەن وقىمىستىلارىن تانىتۋ ماقساتىندا كونفەرەنتسيالار ۇيىمداستىرۋ جانە ولاردى كورسەتۋ جونىندە ماتەريالدار ازىرلەۋدى، قازاق تاريحى جانە ادەبيەتى جونىندە ءار جىلى ەڭ از دەگەندە 2 كىتاپتى تۇرىكشەگە اۋدارتۋدى موينىنا مىندەت ەتىپ الىپ وتىر.
قاۋىمداستىق بيىل ىستامبۇلدا ناۋرىز مەرەكەسىن تويلاۋدى قولعا الىپ وتىر. 
