يزرايلدە اسكەرگە شاقىرىلاتىن ايەلدەر سانى رەكوردتىق كورسەتكىشكە جەتتى

استانا. قازاقپارات -  يزرايلدە اسكەر قاتارىنا شاقىرتىلعان نازىك جاندىلاردىڭ سانى رەكوردتىق كورسەتكىشكە جەتىپ وتىر. ولاردىڭ كوبى ءوز بورىشىن شەكارانىڭ ەڭ قاۋىپتى اۋماعىندا وتەۋدى قالايدى ەكەن.

ارۋلار حالىقارالىق ايەلدەر كۇنىن دە قولدارىنا اۆتومات ۇستاپ قارسى الدى. يزرايل اسكەرىندە حالىقارالىق ايەلدەر كۇنى مەرەكەسىن تەك قىزداردىڭ كوڭىل- كۇيىنەن عانا اڭعارۋعا بولادى. ال قالعانى كۇندەگىدەي تەمىردەي ءتارتىپ.

بۇگىنگى باستى جوسپار -  تانكتى قالا كوشەلەرىندە جۇرگىزۋدىڭ قىر- سىرىن ۇيرەنۋ.

ميري حامەتسكي، ينسترۋكتور:

 - ءبىز ساربازدارعا سوعىستا قالاي قيمىلداۋ كەرەكتىگىن ۇيرەتەمىز. ولاردى جاتتىقتىرىپ، كەز- كەلگەن جاعدايعا دايىن ەتىپ شىعارامىز.

 اسكەري قىزمەتتە شىڭدالعان قىزداردى نازىكجاندى دەپ ايتۋعا اۋىز بارمايدى. سەبەبى مۇندا ولار ۇشاقپەن ۇشىپ، تانكتى باسقارادى. بۇل ەلدە وتان تىنىشتىعىنا ايەلدەر دە جاۋاپتى.

 يۋريي كۋكانوۆ، وفيتسەر- ينسترۋكتور:

 - ءبىز تاۋلى جەرلەردە جاياۋ اسكەردىڭ ۇرىس     ارەكەتىن ۇيرەتەمىز. باستى ماقساتىمىز وسى. ال ساربازدىڭ جىگىت نەمەسە قىز بولعانى ماڭىزدى ەمەس. ءتىپتى كوپ جاعدايدا ايەل ادامدار ەرلەردەن دە اسىپ تۇسەدى.

بىرنەشە جىل بۇرىن نازىكجاندىلار تەك ساناۋلى عانا اسكەري بولىمشەلەردە بولعان. ال قازىر ولار قارۋلى كۇشتەردىڭ بارلىق بولىمىندە بورىشىن وتەۋدە. تاۋدا، تاستا، تەڭىزدە، ايتەۋىر قاي جەردە دە نازىك جاندىلار ءوز قىزمەتىن ابىرويمەن اتقارۋدا.

www.24.kz