ەلباسى «اقتوبە جىلىجاي» كەشەنىنە باردى

استانا. قازاقپارات - مەملەكەت باسشىسى نۇرسۇلتان نازاربايەۆ «اقتوبە جىلىجاي» ج ش س جىلىجاي كەشەنىنە باردى، دەپ حابارلادى اقوردانىڭ باسپا ءسوز قىزمەتىنەن.

ەلباسى كەشەندى ارالاپ، كوكونىس ءوسىرۋ تەحنولوگياسىمەن تانىستى.

سونداي- اق، نۇرسۇلتان نازاربايەۆقا اۋىل شارۋاشىلىعىن دامىتۋدىڭ وڭىردەگى نەگىزگى باعىتتارى، سونىڭ ىشىندە ازىق- تۇلىك قاۋىپسىزدىگىن قامتاماسىز ەتۋ جونىندەگى كەشەندى شارالار تۋرالى باياندالدى. بۇدان بولەك، قازاقستان پرەزيدەنتى وبلىستاعى اۋىل شارۋاشىلىعى ونىمدەرىن وندىرۋشىلەرمەن اڭگىمەلەستى.

نۇرسۇلتان نازاربايەۆ عىلىمي تاسىلدەردى قولدانۋدىڭ ماڭىزدىلىعىنا ايرىقشا نازار اۋدارا وتىرىپ، اۋىل شارۋاشىلىعى سالاسىنىڭ ونىمدىلىگىن ارتتىرۋ قاجەتتىگىن ايتتى.

مەملەكەت باسشىسى پلانەتا حالقىنىڭ كوبەيىپ كەلە جاتقانىنا بايلانىستى اگرارلىق سالا ونىمدەرىنە ۇدايى سۇرانىس بولاتىنىنا توقتالدى. سوندىقتان، اۋىل شارۋاشىلىعى تاۋارىن وندىرۋشىلەردى قازاقستان پرەزيدەنتى مەملەكەت ۇسىنعان مۇمكىندىكتەردى تولىق پايدالانۋعا، وندىرىسكە جاڭا تەحنولوگيالار ەنگىزۋگە جانە وزىق حالىقارالىق تاجىريبەلەردى يگەرۋگە شاقىردى.

جابىق جەردە كوكونىس وندىرەتىن جىلىجاي كەشەنى جالپى اۋدانى 3 گەكتار اۋماقتا ورنالاسقان. جوبالىق قۋاتى جىلىنا 1500 توننا كوكونىس وندىرۋگە لايىقتالعان.