ەۋروپالىق قايتا قۇرۋ جانە دامۋ بانكى كوكشەتاۋدىڭ كوممۋنالدىق سالاسىنا قارجى قۇيۋعا نيەتتى

كوكشەتاۋ. قازاقپارات - اقمولا وبلىسىنىڭ اكىمى سەرگەي كۋلاگين ەۋروپالىق قايتا قۇرۋ جانە دامۋ بانكىنىڭ وكىلدەرىمەن كەزدەستى، دەپ حابارلادى وبلىس اكىمىنىڭ باسپا ءسوز قىزمەتىنەن.

كەزدەسۋدە ايماق باسشىسى اتالعان بانكپەن ارىپتەستىك ورناتۋعا قىزىعۋشىلىق تانىتىپ وتىرعاندىعىن اتاپ ءوتتى.

«قازىرگى كەزدە ءبىز سىزدەرمەن ارىپتەستىك ورناتۋعا نيەتتىمىز. مەنىڭ تاپسىرماما سايكەس كوكشەتاۋ قالاسىنىڭ اكىمدىگى سۋ جانە جىلۋمەن جابدىقتاۋ، سۋ جىبەرۋ باعىتىندا سىزدەرمەن بەلسەندى جۇمىس ىستەي باستادى. وعان قوسا ءبىز سىزدەرگە ستەپنوگور، اتباسار، ەرەيمەنتاۋ، دەرجاۆينسك، ماكينسك قالالارى جانە ارشالى كەنتىندە دە سۋ جانە جىلۋمەن جابدىقتاۋ نىساندارىنىڭ قۇرىلىسىن قارجىلاندىرۋ مۇمكىندىگىن قاراستىرۋدى ۇسىنامىز»، - دەدى وبلىس اكىمى.

وسى رەتتە ەۋروپالىق قايتا قۇرۋ جانە دامۋ بانكىنىڭ وكىلى باحتيەر فايزيەۆ ۇسىنىلعان بارلىق جوبالار قارالاتىنىن جانە ونىڭ ىشىندە كوكشەتاۋ قالاسىن سۋمەن جابدىقتاۋ جوباسىن پيلوتتىق رەتىندە تاڭداپ الۋعا نيەتتى ەكەنىن ايتتى.