قازاق حالقىنا العىستى تەك مەرەكەدە عانا ايتپاۋىمىز كەرەك - پاك لي

استانا. قازاقپارات - العىستى تەك مەرەكەدە عانا ايتپاۋىمىز كەرەك. سەمەيدەگى كارىس ۇلتىنىڭ وكىلى، ساياساتتانۋ عىلىمىنىڭ دوكتورى پاك لي «ديدار» گازەتىنە بەرگەن سۇحباتىندا وسىلاي مالىمدەدى.

ونىڭ ايتۋىنشا قانشاما حالىقتى باۋىرىنا باسقان قازاق حالقىنا العىس ايتىلۋى كەرەك ەكەن. «ءبىزدىڭ ۇلتىمىزدىڭ قيىن- قىستاۋ زاماندا ەڭ العاش قونىس اۋدارعان جەرى - الماتى وبلىسىنداعى ۇشتوبە قالاسى. سول قالادا ءبىز 1999 -جىلى قازاق حالقىنا العىس رەتىندە قارا تاستان جاسالعان پيراميدا تۇرىندە ەسكەرتكىش ورناتتىق. ويتكەنى ءبىزدىڭ كارىس اتا-بابالارىمىزدىڭ باسىنا تۇسكەن كۇن ەشقاشان ۇمىتىلماۋى ءتيىس. ارينە، العىستى تەك مەرەكەدە عانا ايتپاۋىمىز كەرەك»، - دەپ سانايدى پاك لي.

«توتاليتارلىق جۇيە ميلليونداعان ازاماتتاردىڭ تاعدىرىن تالكەككە سالدى. سول جىلدارى ۇلتتىق مۇددەنى قورعاعان زيالىلاردى، قاراپايىم ەڭبەك ادامدارىن جازىقسىز قۋدالاسا، كەيىننەن بۇل ساياسات شەكارالىق ايماقتاعى تۇتاستاي حالىقتاردى تۋعان جەرىنەن ايىرىپ، باسقا ايماققا كۇشپەن جەر اۋدارتتى. ولاردى قونىستاندىرعان جەردىڭ قاتارىندا قازاقستان دا بار بولاتىن»، دەپ جازادى باسىلىم.