ۇلت تاربيەسى: بالاڭىزعا جاسىنا قاراي تالاپ قويىپ ءجۇرسىز بە؟
ەر بالالاردىڭ 7 مەن 10 جاس ارالىعىن «قوزى جاسى» دەپ، بۇل جاستاعى بالالارعا ءار تۇلىك مال مەن ونىڭ تولدەرىنىڭ بەلگى، قاسيەتتەرىن جىعا تانۋ تالابىن قويعان.
ال، 10 جاستان 20 جاسقا دەيىنگى جاستى «قوي جاسى»، «وتان جاسى» دەپ اتاپ، وسى ون مەن جيىرما جاس ارالىعىنداعى ەر بالالارعا قويدىڭ قىرىق قايىرىمىن ءبىلۋ، استىق جيناۋدىڭ سياقتى التى ءادىسىن، باعباندىقتىڭ كوشەت وتىرعىزۋ، باپتاۋ، جالعاۋ، بۇتاۋ، ءۇزۋ، ساقتاۋ سياقتى امالدارىن تولىق مەڭگەرۋ تالابى قويىلعان.
20 جاستان 30 جاسقا دەيىنگى جاستى «جىلقىشى جاسى» دەپ اتاپ، بۇل جاستاعى ازاماتتارعا ەل تانىپ، جەر تانىپ، تىڭ جول تاۋىپ، جاڭا باستاما كوتەرىپ، جىلقىنىڭ جيىرما قاسيەتىن مەڭگەرىپ، جەتى قاراڭعىدا اداسپاي جول تاباتىن، ءقاۋىپ- قاتەرگە جولىققاندا ەرلىك كورسەتە الاتىن، باتىل دا، باتىر بولۋ تالابى قويىلادى.
«وتىزىڭدا وردا بۇزباعان قىرقىندا قىر اسپايدى» دەپ، جاس كەزىندە ەل نازارىن اۋدارىپ وزىندىك ونەر كورسەتپەگەن ەر ازاماتتاردى ازامات دەپ ساناماعان. ال، قىرىق جاستى «جىگىت اعاسى»، «ءدۇر جىگىت» دەپ اتاپ، قىرىققا كەلگەن ءاربىر ازاماتقا ەلگە تىرەك، السىزگە قورعان بولىپ، ەل- جۇرتىنىڭ كەتكەن كەگى مەن وتكەن ءوشىن الىپ، وتانى مەن حالقىنىڭ مۇڭىن مۇڭداپ، جوعىن جوقتاۋ پارىزىن جۇكتەگەن.
«ەز تىرلىكتەن - ەر ءولىم»، «ەرلىك - جىگىتتىڭ جىگىتتىگىن تانىتاتىن باعالى قاسيەت» دەپ، ەل نامىسى، ەر نامىسى ءۇشىن، سىن ساعاتقا تۇسەر ساتتە بۇگەجەكتەپ، جالتاقتاپ، ءوزىنىڭ باس اماندىعى مەن جەكە مۇددەسىن كۇيتتەپ، ەل نامىسى مەن ەر نامىسىن قورعاي الماعان ەركەكتى ەركەك دەپ ساناماعان، قايتا ونداي جىگىتتەرگە: «ەز، نامىسسىز، جەتەسىز» دەپ لاعنەت ايتقان.
دەرەككوزى: «اعاش بەسىكتەن جەر بەسىككە دەيىن» كىتابى.
