كەنەسارى حاننىڭ ۇزەڭگىلەسى ەسەت باتىردىڭ سۋرەتى تابىلدى
سونىمەن قاتار، رەسەي بەكەتتەرىنە شابۋىل جاساپ وتىردى. 1855-جىلى ورىنبور گەنەرال-گۋبەرناتورى كىشى ءجۇزدىڭ ءبىر توپ بيلەۋشى سۇلتاندارىنا كوتەرىلىستى باسىپ، ەسەت باتىردى قولعا تۇسىرۋگە قاتاڭ تاپسىرما بەرەدى.
ماۋسىمنىڭ اياعىندا تاپسىرمانى ورىنداۋ ءۇشىن 900 ادامدىق وتريادپەن، وزىنە بەكىتىلگەن ەكى زەڭبىرەگى بار كازاك جۇزدىگى جانە ديستانتسيا باستىقتارىمەن بىرگە ارىستان جانتورين جورىققا اتتانىپ، ور بەكىنىسىنەن 140 شاقىرىم جەر شاماسىنداعى ەلەك وزەنىنىڭ جوعارعى ساعاسىنداعى سۋىقسۋ شاتقالىنا كەلىپ بەكىنەدى.
سۇلتان ورداسى مەن كوتەرىلىسشىلەر اراسىندا بىرنەشە كۇن بويى كەلىسسوز جۇرگىزىلىپ، ەكى جاق ناقتى شەشىمگە كەلە المايدى. وسىدان كەيىن ەسەت باتىر ءوز ادامدارىمەن كەڭەسىپ، سۇلتان ورداسىنا شابۋىل جاساۋدى ويلاستىرادى. 1855-جىلى شىلدەدە كوتەرىلىسشىلەر سۇلتان ورداسىن تۇتقيىلدان شابۋىلداپ، ا. جانتورين باستاعان ون شاقتى ءبي-ستارشىندارىن ءولتىرىپ، كازاك وتريادىن تالقاندايدى. كەيىن رەسەي يمپەرياسى كەلىسسوزدەر جۇرگىزىپ، ەسەت باتىر تالاپتارىن ايتىپ، كوتەرىلىستەن باس تارتتى. «كىشى ءجۇزدىڭ ءبيى» رەسمي لاۋازىمعا يە بولدى.
ەسەت باتىردىڭ سۋرەتىن ونىڭ شوپشەگى جاندوس تەمىرعالي تاپتى. بۇل سۋرەتتى وعان ماسكەۋدەن جىبەردى - تانىسى مۇراعاتتان تاۋىپتى. باتىردى فوتوعا كيىز ۇيدە وتىرعان كۇيى ءتۇسىرىپتى. بۇل سۋرەت ەسەت باتىر قارۋىن تاستاعان سوڭ، 1859-جىلى 29- ناۋرىزدا ونى قازاق بيلەرىنىڭ دەلەگاتسياسى قۇرامىندا سانكت-پەتەربورعا II الەكساندر قابىلداۋىنا شاقىرىلعانىن راستايدى.
رەسەي سىرتقى ىستەر مينيسترلىگى ازيا دەپارتامەنتىنىڭ ديرەكتورى بولعان ە. كوۆاليەۆسكي باتىرمەن كەزدەسكەنىن بىلايشا سۋرەتتەيدى: ارال ماڭىنداعى كىشى ءجۇز قازاقتارىنىڭ كەيبىر توپتارىنان قۇرىلعان وتارشىلدىققا قارسى قوزعالىستى باسقارۋىنان بۇرىن ەسەتتى سايىن دالا تورابىنان كەزدەستىردىم. ەسەت گەركۋلەس سياقتى اتلەتيكالىق دەنە ءبىتىمدى، سۇلۋ كەلبەتتى جانە ەرلىك ءىس-ارەكەتتەرى كەز-كەلگەن ەۋروپالىقتى تاڭعالدىراتىنداي جانە بۇل قاسيەتتەرى ءوز وتانداستارىنا دا قاتتى اسەرىن تيگىزگەن».
جاندوس تەمىرعالي ءوزىنىڭ كەسكىن-كەلبەتى ەسەت باتىرعا ۇقسايتىنىن جانە بويىندا باتىردىڭ قانى بارىن ماقتان تۇتادى. ارعى اتاسىنىڭ ەرلىگى جايلى وعان اجەسى راش ەمبەرگەن قىزى ايتىپ بەرگەن، دەپ جازادى «ەكسپرەسس ك» باسىلىمى.
