باتىس قازاقستاندىق قازاق تەاترىندا «كەلىسىمشارت بويىنشا قالىڭدىق» قويىلدى

ورال. قازاقپارات - باتىس قازاقستان وبلىستىق قازاق دراما تەاترىندا رەسەيلىك دراماتۋرگ، الانيانىڭ ەڭبەك سىڭىرگەن ونەر قايراتكەرى اساحمات ايلاروۆتىڭ «كەلىسىمشارت بويىنشا قالىڭدىق» اتتى شىعارماسى بويىنشا كومەديا قويىلدى.

تۋىندىنى تەاتردىڭ بەلدى ارتىستەرىنىڭ ءبىرى سامال ءابۋوۆ ساحنالاسا، اۋدارعان زايىبى، كومەديالىق رولدەردى جاندىرىپ جىبەرەتىن اكتريسا ەلميرا ماقاشيەۆا. سۋرەتشىسى - مۇرات مامبەتوۆ.

قازاقستاننىڭ ەڭبەك سىڭىرگەن قايراتكەرى ەربول ەسەندوسوۆ، سونداي- اق رينات سابىرعاليەۆ، ەلميرا ماقاشيەۆا، ماناس كەنجەتايەۆ، جۇلدىز مامەدوۆا وينايتىن قويىلىم وقيعاسى بىلايشا ءوربيدى. ۇنەمى قۇلپىتاسقا سۋرەت سالۋمەن اينالىسىپ، اراق ءىشۋدى جەك كورمەيتىن سالت باستى تەميككو ء(ارتىس ە. ەسەندوسوۆ) كورشىسى سيكومەن (ر. سابىرعاليەۆ) ءبىر قويعا باستەسىپ، ماس كۇيىندە رەسەي پرەزيدەنتىن قوناققا شاقىرادى. ونى ءوزى بىلمەيدى دە. كۇتپەگەن جەردەن پرەزيدەنت اپپاراتىنان حابارلاسىپ، مۇنىڭ شاقىرتۋى قابىل العانىن ەستىگەننەن كەيىن ابىر- سابىر باستالادى. پرەزيدەنت كەلىپ- كەتكەنشە كەلىسىمشارت بويىنشا قالىڭدىق الۋ كەرەك بولادى.

جەرگىلىكتى بيلىك وكىلى ارساماگ (م. كەنجەتايەۆ) ارقىلى دزەراسسامەن (ە. ماقاشيەۆا) كەلىسىمشارت جاسالىپ، مۇنىڭ سوڭى كۇلكىلى جاعدايلارمەن جاقسى كورۋگە ۇلاسادى. ايەلى حاميتسيوننان (ج. مامەدوۆا) ونەبويى تاياق جەپ، قاشىپ جۇرەتىن سيكو سونىڭ ءبارىنىڭ كۋاگەرى بولادى. قويىلىم قوعامداعى ماسكۇنەمدىك، جاعىمپازدىق، كوزبوياۋشىلىق، ءوز پايداسىن ويلاۋشىلىق سىندى كەلەڭسىز جايتتاردى سىناۋمەن بىرگە قانداي ادامنىڭ دا العا ۇمتىلىپ، ماقساتكەرلىك تانىتسا، ءوز باقىتىنا قول جەتكىزە الاتىنىن اڭعارتادى.

بۇل - وسىعان دەيىن كىشكەنتاي بۇلدىرشىندەر ءۇشىن ءتورت بىردەي ەرتەگىنى ساحنالاعان سامال ءابۋوۆتىڭ رەجيسسەر رەتىندەگى تۇڭعىش تۋىندىسى. جۋىردا عانا قىرعىزستاننىڭ ەڭبەك سىڭىرگەن مادەنيەت قايراتكەرى، دراماتۋرگ نۋربۋبۋ مۋسايەۆانىڭ «سەنىمدى دوس» ەرتەگىسىن (ونى دا ءتارجىمالاعان ەلميرا ماقاشيەۆا) قويعان س. ءابۋوۆ رەجيسسەرلىك قىرىن الداعى ۋاقىتتا دا دامىتپاقشى. كەزىندە ءوزى دە سپەكتاكلدەر قويعان تەاتر تارلاندارىنىڭ ءبىرى، قازاقستاننىڭ ەڭبەك سىڭىرگەن ءارتىسى، مەملەكەتتىك سىيلىقتىڭ لاۋراتى سەردەش قاجىمۇراتوۆتىڭ پايىمداۋىنشا، ءار رەجيسسەردىڭ وزىندىك جاڭالىعى بولادى. سامال بۇل جولى رينات سابىرعاليەۆتىڭ اكتەرلىك دارىنىن جارقىراتا كورسەتە ءبىلدى.

 ايتا كەتەيىك، بۇل - باتىس قازاقستاندىق تەاتردىڭ سوڭعى ەكى ماۋسىمداعى ون التىنشى پرەمەراسى.

اۆتور: ەلجان ەرالى