ا. وسمان: ءتىل - ۇلتتىڭ جان تىنىسى

الماتى. قازاقپارات- ءتىل - ۇلتتىڭ جان تىنىسى، رۋحاني ءۇنى، ەڭ اسىل قازىناسى. بۇگىن الماتىداعى دوستىق ۇيىندە حالىقارالىق انا ءتىلى كۇنىنە ارنالعان «انا ءتىلىم - ارداعىم» اتتى تىلدەر فەستيۆالى اياسىندا بەلگىلى قوعام قايراتكەرى، قازاقستان حالقى اسسامبلەياسىنىڭ مۇشەسى، فيلولوگ عالىم اسىلى وسمان وسىلاي دەدى.

«ءتىل - ۇلتتىڭ جان تىنىسى، رۋحاني ءۇنى، ەڭ اسىل قازىناسى. ءتىلى جوعالعان، ءتىلى قولدانىستان قالعان ۇلت - ۇلت بولىپ سانالمايدى. ويتكەنى، ونىڭ ۇلتتىق ەرەكشەلىكتەرى، ۇلتتىق قۇندىلىقتارى وسى ءتىلى ارقىلى پاش ەتىلەدى. ءتىل - قۇدىرەتتى دە كيەلى كۇش. ءاربىر ۇلت ءوزىنىڭ انا تىلىمەن تانىلادى، انا تىلىمەن بەلگىلى بولادى. سوندىقتان ونى سىيلاپ، ايالاي بىلگەن ابزال»، - دەدى ا. وسمان.

سونىمەن قاتار، اسىلى ءالي قىزى تەك ءوز ءتىلىڭدى عانا ەمەس، وزگە تىلدەردى دە ءبىلۋ قاجەتتىلىگىن ءتۇسىندىردى.

«وزگە ۇلتتىڭ جان-دۇنيەسىن ونىڭ ءتىلى ارقىلى ۇعىناسىڭ عوي. ۇلى اباي ايتقانداي، «وزگە ءتىلدى ءبىلۋ ارقىلى ءوز ۇلتىڭ مەن وزگە ۇلتقا تەڭ قارايسىڭ». وزگە ۇلت وكىلدەرىن وزىڭە تەڭ كورەسىڭ. ۇلتارالىق تاتۋلىق وسىدان تۋىندايدى. ءتىلدى سىيلاعانىڭ - ۇلتتى سىيلاعانىڭ. «ءتىل تاعدىرى - ۇلت تاعدىرى» دەپ بەكەرگە ايتىلماعان. ءتىل ساقتالسا - ۇلت تا ساقتالادى. سوندىقتان، وسىنداي تىلدەر فەستيۆالىنىڭ تىلدەردى دامىتۋدا ماڭىزى وتە زور.

قازاقستاندا تۇرىپ كەلە جاتقان ءتۇرلى ەتنوستار وزدەرىنىڭ تىلدەرىن، مادەنيەتى مەن سالت- ءداستۇرىن لايىقتى ساقتاپ كەلە جاتىر. مۇنىڭ بارلىعى قازاق حالقىنىڭ كەڭدىگى مەن ەلباسىنىڭ دانا ساياساتىنىڭ ارقاسى دەپ بىلەمىن. سوندىقتان وسىنداي مەرەكەلەر كوپ بولسىن»، - دەدى ا. وسمان.

ايتا كەتەلىك، حالىقارالىق انا ءتىلى كۇنى 1999-جىلدىڭ 17- قاراشاسىندا بولعان يۋنەسكو-نىڭ باستى كونفەرەنتسياسىنىڭ 30-سەسسياسىنداعى قاۋلىسىمەن بەكىتىلگەن بولاتىن. سودان باستاپ، تىلدىك جانە مادەني ەرەكشەلىكتەر مەن كوپتىلدىلىكتى ساقتاۋ ماقساتىندا 2000-جىلدان بەرى ءار جىلدىڭ 21- اقپانىندا تۇراقتى تۇردە اتاپ ءوتىلىپ كەلەدى.

اۆتور: جاپپاربەرگەن ايبوتا