كورەرمەن نازارىنا «قازاقستان» ارناسى «اكە» تەلەحيكاياسىن ۇسىنباق
فيلمنىڭ مازمۇنى جالعىزباستى اكەنىڭ ءومىرى تۋرالى ءوربيدى. جارىنان ايىرىلعان جالعىزباستى اكە قىزى مەن ۇلىن ەرتىپ، اۋىلدان الماتىعا كوشىپ كەلەدى. بالالارىنىڭ بولاشاعىنا الاڭداعان ول قالادا جاقسى جۇمىسقا ورنالاسىپ، ۇلكەن مۇمكىندىكتەر مەن باقىتتى ومىرگە قول جەتكىزۋگە بولادى دەپ سەنەدى.
بالالارىن قاتارىنان كەم قىلماي وقىتىپ، ولاردىڭ ۇلكەن ومىرگە دۇرىس قادام باسۋىنا كومەكتەسكىسى كەلەدى. ءبىراق، بالالارى قالا ومىرىنە بەيىمدەلە قويمايدى. اكەلەرى وزىنە وڭتايلى جۇمىس ىزدەپ، كوپ قينالادى. ءومىردىڭ قادام باسقان سايىن الدىڭنان شىعا كەلەتىن سان ءتۇرلى قيىندىقتارىنا شىداس بەرۋگە اكەنىڭ كۇشى جەتە مە؟ اكەلەرىنە دەگەن بالالىق ماحابباتى سونۋگە اينالعان ساتتە باۋىر ەتى بالالارىنىڭ وزىنە دەگەن كىرشىكسىز ماحابباتى مەن سەنىمىن كەرى قايتارۋ جولىندا اكە قانداي تاۋەكەلدەرگە بارادى؟
سەريالدا وسى ماسەلەلەر قوزعالماق. سەريال كورەرمەندەرگە ناۋرىز ايىندا جول تارتادى. سسەناري اۆتورى - اسقار ۇزابايەۆ، سەرگەي ليتوۆچەنكو، سالتانات مۇحتاروۆا. قويۋشى رەجيسسەرى - اسقار ۇزابايەۆ. اكتەرلار - ازات سەيتىمەتوۆ، جۇلدىز ءانۋاروۆا، ءاليحان بايسۇلتان.
