د. ابايەۆ ن. نازاربايەۆتىڭ ءتىل جونىندەگى ايتقان سوزىنە تۇسىندىرمە بەردى
Tengrinews.kz اگەنتتىگىنەن سۇراق:
«مەملەكەت باسشىسى «تىلدەر تۋرالى» زاڭدى ساقتاۋ جونىندەگى كەشەگى مالىمدەمەسى الەۋمەتتىك جەلىلەردە ءارتۇرلى جاڭعىرىق تۋعىزدى. پرەزيدەنتتىڭ ادامدار ءبىر تىلدە بەرىلگەن سۇراققا مەملەكەتتىك ورگانداردان سول تىلدە جاۋاپ الۋى ءتيىس، دەگەن ءسوزىن كەيبىر ازاماتتار تۇسىنبەستىكپەن قابىلدادى. مەملەكەت باسشىسى بۇل ارقىلى نە ايتقىسى كەلگەنىن ءتۇسىندىرىڭىزشى؟».
داۋرەن ابايەۆ: «ءوزىنىڭ سوزىندە پرەزيدەنت شەنەۋنىكتەر مەملەكەتتىك قىزمەت كورسەتە وتىرىپ، ازاماتتاردىڭ تىلدىك ساۋالىن ەسكەرۋى ءتيىس ەكەنىن قاداپ ايتتى.
«تىلدەر تۋرالى» زاڭدا «مەملەكەتتىك جانە مەملەكەتتىك ەمەس ۇيىمداردىڭ ازاماتتاردىڭ وتىنىشتەرىنە جاۋاپتارى جانە باسقا قۇجاتتار مەملەكەتتىك تىلدە نەمەسە ءوتىنىش ەتىلگەن تىلدە قايتارىلادى»، دەپ جازىلعان.
شەنەۋنىكتەر كەيدە زاڭنىڭ ءبىر بولىگىن عانا ەسكەرەتىن جاعدايلارى بولىپ تۇرادى. ەل پرەزيدەنتى، مىنە، ناق وسىنداي زاڭدى جارتىكەش تۇسىنەتىن مەملەكەتتىك قىزمەتكەرلەرگە قاراتا ايتىپ وتىر.
مىسال رەتىندە ول ورىس تىلىندەگى وتىنىشتەردى كەلتىردى، الايدا وسى قاعيدا بيلىك وكىلدەرى قازاق ءتىلدى ازاماتتارعا جاۋاپ قايتارا الماي قالاتىن جاعدايلارعا دا قاتىستى.
سوندىقتان دا وسى تاقىرىپ توڭىرەگىندەگى الاڭداۋشىلىققا نەگىز جوق. مەملەكەتتىك ءتىلدى دامىتۋ - مەملەكەتتىك ساياساتتىڭ باسىمدىقتى باعىتتارىنىڭ ءبىرى جانە ونى كەز كەلگەن كەمسىتۋ قازاقستاننىڭ ۇلتتىق مۇددەلەرىنە قايشى كەلەدى».
