15:56, 16 - اقپان 2016 | GMT +5
ەلباسى الماتىنىڭ الاتاۋ اۋدانىندا سالىناتىن مەشىت قۇرىلىسىنىڭ جوباسىمەن تانىستى
الماتى. قازاقپارات - مەملەكەت باسشىسى 7 مىڭ ادامدىق مەشىت قۇرىلىسىنىڭ جوباسىمەن تانىستى، سونداي- اق قالاداعى ءدىني كونفەسسيا جانە شىعارماشىل زيالى قاۋىم وكىلدەرىمەن كەزدەستى.
بۇل تۋرالى اقوردانىڭ باسپا ءسوز قىزمەتىنەن حابارلادى.
قۇرىلىسى جوسپارلانعان عيماراتتىڭ جالپى الاڭى - 16 مىڭ شارشى مەتر. ارحيتەكتۋرالىق جوباعا سايكەس، مەشىتتە بيىكتىگى 75 مەترلىك بىرنەشە مۇنارا بولادى. كەشەننىڭ ورتالىق بولىگىندە 9 كۇمبەزدى نەگىزگى عيمارات ورنالاسادى. سونداي- اق ونىڭ قۇرامىنا يسلام كىتاپحاناسى، اكىمشىلىك بولىك، ناماز وقيتىن زالى بار ايەلدەر كورپۋسى، ءدىني راسىمدەر وتكىزۋگە ارنالعان زال، وقۋ- اعارتۋ توپتارىنا ارنالعان جانە مەدرەسە سىنىپتارى بار ەرلەر بولىگى، سونداي- اق شەبەرحانا مەن دۇكەندەر كىرەدى.
