17:52, 13 - اقپان 2016 | GMT +5
رەسەيلىكتەردەن قۇتىلىپ، ءبىزدىڭ شەكاراشىلارعا تۇتىلدى
استانا. قازاقپارات - قوستاناي شەكارا وتريادىنىڭ جەدەل كەزەكشىسىنە رەسەي فەدەراتسياسىنىڭ فەدەرالدىق قاۋىپسىزدىك قىزمەتى شەكارا قىزمەتىنىڭ قورعان جانە تيۋمەن اۋماعى بويىنشا شەكارالىق باسقارماسىنىڭ جەدەل كەزەكشىسىنەن تەلەفون ارقىلى اقپارات كەلىپ ءتۇستى.
اقپاراتتا رەسەي اۋماعىندا ورنالاسقان تسەليننوە ەلدى مەكەنىنەن قازاقستان جاقتاعى زاگارنينكا ەلدى مەكەنىنە قاراي كەتكەن ادام ءىزىنىڭ تابىلعانى تۋرالى ايتىلدى. ءىز ەكى ساعاتتاي بۇرىن تۇسكەن، ياعني «سۋىپ ۇلگەرگەن».
بۇل اۋماق قوستاناي شەكارا وتريادىنىڭ كەڭارال شەكارا زاستاۆاسىنىڭ جاۋاپكەرشىلىگىندە. قازاقستاندىق شەكاراشىلاردىڭ جەدەل قيمىلدارىنىڭ ناتيجەسىندە ارادا كوپ ۋاقىت وتپەي، مەڭدىقارا اۋدانىنىڭ زاگارينكا ەلدى مەكەنىنىڭ ماڭىنان شەكارا بۇزۋشى، 43 جاستاعى گەنادي ەسىمدى قازاقستان ازاماتى ۇستالدى. ول ءوزىنىڭ وسىنداي قادامعا بارعاندىعىن مەملەكەتتىك شەكارادان وتۋگە رۇقسات بەرەتىن قۇجاتتارىنىڭ جوعالعاندىعىمەن ءتۇسىندىردى. الايدا، بۇل قىلمىستىق جاۋاپكەرىشىلىكتەن قۇتقاراتىن سەبەپ ەمەس، دەپ حابارلايدى ق ر ۇ ق ك ش ق باسپا ءسوز قىزمەتى.
