زيكا بەزگەگى قازاقستانعا دا جەتۋى مۇمكىن
بۇل جايىندا ج. بەكشين قازاقپارات اگەنتتىگىنىڭ رەسمي ساۋالىنا بەرگەن جاۋابىندا ايتقان.
ونىڭ اتاپ وتۋىنشە، قازاقستان اۋماعى زيكا بەزگەگى اۋرۋى بويىنشا ەندەميالىق ءوڭىر ەمەس. ياعني، بەزگەكتىڭ تارالۋى ءۇشىن تابيعي ورتا جوق. زيكا بەزگەگى ادامنان ادامعا جۇقپايدى. ول تروپيكالىق جانە سۋبتروپيكالىق بەلدەۋلەردە تىرشىلىك ەتەتىن Aedes egypti ماساسى شاققان كەزدە ادامدارعا تارالادى.
«وسىعان بايلانىستى قازاقستان اۋماعىندا، سونىمەن قاتار ونىمەن شەكتەسەتىن ەلدەردە جانە ورتالىق ازيا وڭىرىندە ماسانىڭ اتالعان ءتۇرى كەزدەسپەيدى. قازاقستاندا تىرشىلىك ەتەتىن ماسالار اراسىندا زيكا بەزگەگىنىڭ تارالۋ قاۋپى جوق. دەگەنمەن، تۋريستىك بەلسەندىلىك پەن حالىق كوشى-قونىنىڭ جوعارى بولۋىنا وراي ينفەكتسيانىڭ كەلۋى قاۋپى بار»، - دەدى ول.
قازاقستان باس سانيتار دارىگەرىنىڭ ايتۋىنشا، ەل اۋماعىنا زيكا بەزگەگىنىڭ اكەلىنۋىنىڭ الدىن الۋ ءۇشىن تۋريستىك وپەراتورلارمەن جۇمىستار جۇرگىزىلۋدە. ولار زيكا بەزگەگى تاراعان ەلدەرگە ساپارلايتىن ادامدارعا، ونىڭ ىشىندە جۇكتى ايەلدەردە دە ۆيرۋستىڭ قاۋىپتى ەكەندىگىن تۇسىندىرۋدە. بۇعان قوسا قازاقستاننىڭ مەملەكەتتىك شەكارالارىندا شەتەلدەن كەلگەن ادامداردى سانيتارلىق-كارانتيندىك باقىلاۋ جۇرگىزىلۋدە.
«زيكا بەزگەگىنە قارسى ءدارىنىڭ جانە ەمىنىڭ بولماۋىنا بايلانىستى تۇتىنۋشىلار قۇقىعىن قورعاۋ كوميتەتى شەت ەلدەرگە ساپار جوسپارلاۋ بارىسىندا ۇسىنىلعان اقپاراتتى ەسكەرۋگە جانە اسىرەسە جۇكتى ايەلدەردە ەپيدەميولوگيالىق احۋال تۇراقتانعانعا دەيىن زيكا بەزگەگى تاراعان ەلدەرگە مۇمكىندىگىنشە ساپارىن كەيىنگە شەگەرۋگە كەڭەس بەرەدى»، - دەدى ج. بەكشين.
اۆتور: مارلان جيەمباي
