12:16, 13 - اقپان 2016 | GMT +5
سارا نازاربايەۆا ورىس پراۆوسلاۆ شىركەۋىنىڭ ناگراداسىمەن ماراپاتتالدى
استانا. قازاقپارات - ماسكەۋ جانە بۇكىل رۋستىڭ اسا كيەلى پاتريارحى كيريلل «بوبەك» رەسپۋبليكالىق بالالار قورىنىڭ پرەزيدەنتى سارا الپىس قىزى نازاربايەۆانى كيەلى اپوستولعا تەڭ كنياگينيا ولگانىڭ 1- دارەجەلى وردەنىمەن ماراپاتتادى، دەپ حابارلادى قازاقستان رەسپۋبليكاسىنىڭ ميتروپوليت وكرۋگىنەن.
سارا الپىس قىزى جوعارى شىركەۋلىك ماراپاتقا «استانا ەپارحياسىنا كومەك كورسەتكەنى جانە 75 جىلدىق مەرەيتويىنا بايلانىستى» لايىق دەپ تانىلعان.
كيەلى اپوستولعا تەڭ كنياگينيا ولگانىڭ وردەنىن كيەلى پاتريارح پيمەن مەن قاسيەتتى سينود 1988-جىلدىڭ 28- جەلتوقسانىنان باستاپ، رۋستىڭ شوقىنۋىنىڭ 1000 جىلدىعى قۇرمەتىنە تاعايىنداعان. كيەلى ولگا رۋستا ءوزىنىڭ دىنشىلدىگىمەن ەرەكشەلەنگەن. شىركەۋ ونى اپوستولعا تەڭ دەپ قۇرمەتتەپ، ونىڭ ەسىمىن ءدىني اندەرىندە اتايدى.
اپوستولعا تەڭ كنياگينيا ولگانىڭ وردەنى شىركەۋلىك، مەملەكەتتىك جانە قوعامدىق قىزمەتتىڭ ءتۇرلى سالالارىندا قىزمەت اتقارعان، سونداي-اق جاقىندارىنا قالتقىسىز قىزمەت ەتكەن ايەلدەر ماراپاتتالادى.
