بەيبارىس سۇلتان ۇستاعان قۇران كوشىرمەسى ەلگە جەتكىزىلەدى

استانا. قازاقپارات - مىسىر بيلەۋشىسى بەيبارىس سۇلتانعا تيەسىلى قۇراننىڭ ۇلىبريتانيا ۇلتتىق كىتاپحاناسىندا ساقتالىپ كەلگەن ەلەكتروندى كوشىرمەسى قازاقستانعا جەتكىزىلەتىن بولادى.

 سونىمەن قاتار، كورولدىكتىڭ گەوگرافيالىق قوعامىندا ساقتالعان قازاقتىڭ ەتنوگراف- عالىمى شوقان ۋاليحانوۆتىڭ قاشقارياعا ساياحاتى بويىنشا جازىلعان اعىلشىن تىلىندەگى كىتابىنىڭ كوشىرمەسىن الدىرۋ تۋرالى كەلىسسوزدەر جۇرگىزىلۋدە.

ق ر ۇلتتىق اكادەميالىق كىتاپحاناسىنىڭ ديرەكتورى ءۇمىتحان مۇڭالبايەۆا تۇماندى البيون ەلىنە جاساعان ساپارىنداعى جەمىستى كەلىسسوزدەر جونىندە اڭگىمەلەپ بەردى. «ساپار بارىسىندا ۇلىبريتانيانىڭ پارلامەنتتىك كىتاپحاناسى، ۇلتتىق كىتاپحاناسى مەن كەمبريدج كىتاپحاناسى قورلارىمەن تانىسۋ مۇمكىندىگىنە يە بولدىم. ايتا كەتۋ كەرەك، بريتان ەلىندە كىتاپ مارتەبەسى وتە بيىك، ناسيحاتتاۋ جۇمىستارى وراسان. ۇلىبريتانيا ۇلتتىق كىتاپحاناسىنىڭ ەكىنشى قاباتىندا مۇراجاي ورنالاسقان. وسى مۇراجايدىڭ ۇلكەن زالىندا بەيبارىس سۇلتاننىڭ قۇرانى ساقتاۋلى ەكەن. كىتاپتى كورگەندە ەرەكشە تولقىدىم. قۇران بۇل كىتاپحاناعا كوپ جىلدار بۇرىن جەتكىزىلگەن. ولار قۇراندى ماقتان تۇتىپ، ۇلكەن كورمەگە قويعان» دەيدى ءۇ. مۇڭالبايەۆا.

بريتان كىتاپحاناسىندا «Turning the Page» جوباسى اياسىندا كونە كىتاپتاردى ەلەكتروندى نۇسقاعا كوشىرۋ جۇمىستارى جۇرگىزىلەدى ەكەن. جوبا بويىنشا العاش رەت شەنبورننىڭ 800 جىلداي بۇرىن جازىلعان كىتابى ەلەكتروندى نۇسقاعا كوشىرىلگەن. قازىرگى ۋاقىتتا بەيبارىس سۇلتاننىڭ مەنشىگىندە بولعان ەجەلگى قۇراننىڭ تسيفرلىق نۇسقاسى جاسالىپ جاتىر. جەتى تومنان تۇراتىن قۇران كىتابىن 700  جىلداي بۇرىن بەلگىلى مىسىر كالليگرافى مۇحاممەد ينب ءال- ۋاحيد جازىپ شىققان. قىپشاق ەلىنەن شىعىپ، مىسىردى بيلەگەن بەيبارىس سۇلتاننىڭ امىرىمەن 1304-1306 -جىلدارى كايردە جارىق كورگەن كىتاپتى مۇحاممەد يبن مۋبادير، ايدۋگدي يبن اللاح ءال- بادري ەسىمدى سۋرەتشىلەر بەزەندىرگەن. اراب ستيلىندەگى التىنمەن ارلەنگەن قۇران جازباسى بريتان كىتاپحاناسىنداعى كىتاپتاردىڭ ەڭ قۇندىسى. ءۇمىتحان داۋرەنبەن قىزىنىڭ ايتۋىنشا، قۇران وتە ادەمى بەزەندىرىلگەن. ۇلى اقيقاتتاردان سىر اقتاراتىن سىر اقتاراتىن قاسيەتتى كىتاپتىڭ كوشىرمەسىن ەلگە اكەلۋ الداعى ۋاقىتتىڭ باستى ماقسات بولىپ وتىر. «بەيبارىس سۇلتان قۇرانىنىڭ ەلەكتروندى كوشىرمەسىن ەلگە اكەلۋ ءۇشىن كەلىسسوزدەر جۇرگىزىلۋدە. بۇعان دەيىن ءبىزدىڭ ەل ءوتىنىش جازىپ، 20-30 بەتىن الىپتى. ال بەيبارىس سۇلتاننىڭ كىتابى جەتى تومدىق. قازاقستان ەلشىلىگى وسى كەلىسسوزدەر ناتيجەلى بولۋى ءۇشىن بىزگە قامقورلىق تانىتۋدا. بۇل تاۋەلسىزدىگىمىزدىڭ 25  جىلدىعىنا ۇلكەن تارتۋ بولار ەدى» دەيدى پروفەسسور.

ايتا كەتەيىك، ەتنوگراف- عالىم شوقان ءۋاليحانوۆتىڭ ايگىلى قاشقاريا ساياحاتى تۋرالى ەڭبەگىنىڭ كوشىرمەسىن قازاقستانعا جەتكىزۋ بويىنشا دا كەلىسسوزدەر جۇرگىزىلمەك. عالىمنىڭ اعىلشىن تىلىندەگى A Journey to Kashqar in كىتابى ۇلىبريتانيا كورولدىگى گەوگرافيالىق قوعامىندا ساقتالعان.

e-islam.kz