ميليتسيا قارتايسا، مولدا بولادى
سول ۋاقىتتان باستاپ ءدىني اعىم ءوز جۇمىسىن جانداندىردى.
ءسوز جوق، دىنگە كوزقاراس سول كەزدىڭ وزىندە وزگەرە باستاعان. كەيىن تاۋەلسىزدىك العان سوڭ زاڭ قابىلداندى. ءبىراق ونى قازاق مۇسىلمان قاۋىمى دۇرىس پايدالانا المادى.
سەبەبى دىنگە ورالۋدىڭ ءوزىنىڭ قيىندىعى بار ەدى. شەنەۋنىكتەر ونى تۇسىنە قويمادى. دىنگە كىمدەر ورالدى؟ اعا بۋىن، بۇرىن اتەيست بولىپ قالعان، بولماسا دىننەن قول ءۇزىپ كەتكەن، ءدىن ماسەلەسىنىڭ تەورياسىنان اۋلاق ادامداردىڭ بولعانىن جاسىرا المايمىز.
كەيىن دىنگە كومسومول پارتياسىنىڭ قىزمەتكەرلەرى مەن جاستار كەلدى. دىنگە ورالعاندا جاس ەرەكشەلىكتەرى مەن ومىرلىك تاجىريبەسىنە بايلانىستى ءبولىندى. وڭاي بولعان جوق. وسى تۇستا «ءبىز ءدىندى كىمنەن ۇيرەنەمىز؟» دەگەن سۇراق تۋدى. سول كەزدەگى يمامدار، قازاق حالقىنىڭ رۋحاني تاربيەشىسى، ءدىن تاراتۋشى، بۇرىنعى ءبىزدىڭ ءداستۇرىمىزدى ساباقتاستىقپەن جالعاستىرا المادى. سەبەبى ولاردىڭ ءبىر جاعىنان ءدىني ساۋاتى تومەن، ەكىنشىدەن، يمامدار مەن مولدالار دىننەن قاشىق ادامدار-تۇعىن. «ميليتسيا قارتايسا، مولدا بولادى» دەگەن ماقال سول كەزەڭدە شىقتى. امال جوق، قازانى اتقارۋعا جۇمىس ىستەيتىن ادامدار ەدى. ءدىني ساۋاتىمىز بەن مۇسىلماندىق دەڭگەيىمىز، سونداي-اق بولاتىن.
ءدال سول كەزەڭدە، ارينە، ءدىن ۇيرەتۋشىلەر شەتەلدەن اعىلدى. سەبەبى ەلدەگى ءدىني قىزمەتكەرلەر تاربيە بەرە الماعاننان كەيىن، شەتەلدەن كەلىپ، اقىل ايتاتىندار كوبەيدى. ودان قالدى، جاستار شەتەلگە وقۋعا كەتتى. سىرتتان اعىلعاندار دا، وقىپ كەلگەندەردە دە دۇرىس باعىت كورسەتپەدى. ءارقايسىسىندا «مۇسىلماندىقتى ءبىز اكەلدىك، ءبىز ەنگىزەمىز» - دەگەن يدەيا، تۇسىنىك پايدا بولدى.
تاعى ءبىر قيىندىق ءبىز قانشا جەردەن مۇسىلمان دىنىنە ورالدىق دەگەنىمىزبەن، تەك سىرتقى فورمامىز وزگەردى. ءدىني مەرەكە وتكىزۋ، مۇسىلمان بولىپ، ورامال تارتىپ، تاقيا كيۋ سياقتى دۇنيەمەن شەكتەلدىك. ودان ارىگە بارا المادىق. بارۋ دا مۇمكىن ەمەس ەدى. مۇسىلماندىقتىڭ سىرتقى كورىنىسىنە كوپ ءمان بەردىك.
بۇگىندە ءدىن ماسەلەسىن رەتتەيتىن قۇزىرلى ورگاننىڭ مەكەمەنىڭ اكىمشىلدىك-امىرشىلدىك جۇيەمەن جۇمىس ىستەگىسى كەلىپ، مەشىتكە كەلىپ دىڭكىلدەيدى. كەيبىر جاستاردىڭ ءتۇرلى ءدىني باعىتتى ۇستاناتىنى بەلگىلى. سولارعا شىدامدىلىق، ىجداعاتتىلىق تانىتۋدىڭ ورنىنا، جاعدايدى ۋشىقتىرۋعا دەيىن بارادى. ارتىنا ءتۇسىپ، ورامال تارتقان، ساقال جىبەرگەندەردىڭ وتباسىلارىن قوسا تىزىمگە الىپ، ولاردى جۇمىسقا الماي قوياتىن اپەرباقان جاعداي بار.
پرەزيدەنتتىڭ بەس ينستيتۋتسيونالدى رەفورماسىندا نەگە مەملەكەتتىك قىزمەتكەرلەردى ىرىكتەپ الۋ ماسەلەسىنە ءمان بەرىلگەن؟ بۇلاردىڭ يماندىلىعى تۋرالى ماسەلەنى ايتۋىمىز كەرەك.
ءدىن ماسەلەسىندەگى بۇلاردىڭ دەموكراتيالىق ۇستانىمى، ءبىزدىڭ ەلىمىزدەگى ءدىني احۋالعا ۇلكەن اسەر ەتەدى. ەكىنشىدەن، نەلىكتەن پرەزيدەنت ءوزىنىڭ سوڭعى ماقالاسىندا قۇقىق قورعاۋ ورگانىنا، اسىرەسە، تۇرمەدەگى احۋالعا ءمان بەردى.
سەبەبى قۇقىق قورعاۋ جۇيەسىندە ولار يمامدارمەن، ءدىن قىزمەتكەرىمەن جۇمىس ىستەيدى. سويلەسكەندە مادەنيەتىنىڭ جوقتىعى بايقالادى.
تۇرمەدە بىرنەشە جىل وتىرىپ شىققان ادام اباقتىدا قالاي تۇزەلگەنىن ايتتى. «ءبىز ءوزىمىزدىڭ وتباسىمىزدى ويلاپ، بالا- شاعامىزعا، اتا- انامىزعا قاجەتتىگىمىزدى ويلاپ، وزگەردىك» - دەيدى. سول كۇيىندە ءالى.
جازىپ العان اسقار اقتىلەۋ
jasqazaq.kz
