21:08, 10 - اقپان 2016 | GMT +5
عالىمدار: جىلقى ادام كوڭىل كۇيىن سەزە الادى
استانا. قازاقپارات - جىلقىلار ادامداردىڭ ەموتسيالارىن سەزە الادى، دەپ حابارلادى BBC News اقپاراتتىق پورتالى ۇلى بريتانيا عالىمدارى جۇرگىزگەن زەرتتەۋگە سىلتەمە جاساپ.
بريتانيالىق سۋسسەكس ۋنيۆەرسيتەتىنىڭ زەرتتەۋشىلەرى 28 جىلقىنىڭ قاتىسۋىمەن زەرتتەۋ جۇرگىزدى. وندا جىلقىلارعا ادامداردىڭ ءتۇرلى ەموتسيالارى بەينەلەنگەن سۋرەتتەر كورسەتىلدى.
جۇرەك بەلسەندىلىگىن ولشەيتىن قۇرالداردىڭ ارقاسىندا عالىمدار تەرىس ەموتسيالى سۋرەتتەر جانۋارلاردىڭ جۇرەك قاعىسىن ۇدەتكەنىن انىقتادى.
سۇتقورەكتىلەردىڭ مي قۇرىلىمىنىڭ ەرەكشەلىگىنە بايلانىستى سول كوزبەن كورگەن اقپارات ميدىڭ وڭ جاقتاعى بولىگىمەن وڭدەلەدى. ول ەموتسيالاردى قابىلداۋعا جاۋاپ بەرەدى. زەرتتەۋشىلەر اتاپ وتكەندەي، تاجىريبەگە قاتىسقان جىلقىلار تەرىس ەموتسيالى سۋرەتتەرگە سول كوزبەن قاراعان.
