رەسەيدەگى ەڭبەك ميگرانتتارى ەلدەرىنە قايتۋدا

استانا. قازاقپارات - رەسەيدە ەڭبەك ميگرانتتارىنىڭ سانى ازايا باستادى.

تابىس تابۋ ءۇشىن ادەتتە تاجىكستان، وزبەكستان، مولدوۆا ەلدەرىنەن اعىلىپ باراتىن ازاماتتار رۋبل قۇنسىزدانىپ، كوشى-قوننىڭ جاڭا ەرەجەسى كۇشىنە ەنگەلى بەرى بۇل مەملەكەتتەن ۇدەرە كوشىپ جاتىر.

داعدارىس كەزىندە ولار الدىمەن جۇمىستارىنان ايىرىلسا، ال ءالى جۇمىس ىستەپ جۇرگەندەر بۇرىنعى تابىسىنان قاعىلعان. وسىعان بايلانىستى رەسەيدە جۇمىسشى كۇشى جەتىسپەي جاتىر. وتكەن جىلى رەسەيدە ت م د ەلدەرىنىڭ ازاماتتارى ءۇشىن ءبىرىڭعاي ەڭبەك پاتەنتى ەنگىزىلدى. شەتەلدىكتەر ەندى ورىس ءتىلىن جەتكىلىكتى مەڭگەرگەندىگىن، ەل زاڭدارى مەن تاريحىن بىلەتىنىن، قاۋىپتى دەرتكە شالدىقپاعانىن دالەلدەپ، دەنساۋلىعىن ساقتاندىرۋمەن قاتار الدىن الا تولەم جاساۋى ءتيىس. رەسمي مالىمەتكە سۇيەنسەك، 2015 -جىلى مۇنداي پاتەنتتەر رەسەي بيۋدجەتىنە 29 ميلليارد رۋبل پايدا اكەلگەن. قازىر دە اپتاسىنا 800 ميلليون رۋبل كولەمىندە كىرىس بار. الايدا كوپتەگەن ميگرانتتار ءۇشىن بۇل قالتاعا اۋىر قاراجات بولىپ تۇر.

رۋبلدىڭ قۇنسىزدانۋىن ەسكەرسەك، ولاردىڭ تاپقان تابىسى دا ازايا تۇسكەنىن اڭعارۋ قيىن ەمەس. قازىر رەسەيدە شەتەلدىك 10 ميلليوننان استام ازامات بار، ولاردىڭ 2 ميلليونى وزبەكستاننان، 900 مىڭدايى تاجىكستاننان.

بۇل كورسەتكىش بۇدان ەكى جىل بۇرىنعىدان %20 عا كەم. دەگەنمەن تاجىكستان كوشى-قون قىزمەتىنىڭ رەسمي وكىلدەرى ءوز وتانداستارىنىڭ رەسەيدەن كەرى اعىلۋىن ماۋسىمدىق جۇمىستاردىڭ اياقتالۋىمەن بايلانىستىرادى. وزبەكستان ازاماتى لەۆ ياشين ەكى جىل بۇرىن ماسكەۋدە ايىنا 40 مىڭ رۋبل تاباتىن. ال قازىرگى تابىسى 13 مىڭنان اسپايدى. قاراپايىم ەسەپ: باسپاناعا 8 مىڭ، جولىنا 2 مىڭ، ال تاماعىنا 3 مىڭ كەتەدى. ءبىر قىزىعى، ەندى بۇل ەمەس، وعان تاشكەنتتەگى جانۇياسى جانباعىسقا اقشا جىبەرىپ تۇرادى. ەندى رەسەيگە تاجىكتەر مەن وزبەكتەردەن گورى ۋكرايندار، قىرعىزدار مەن ارميانداردىڭ جۇمىسسىزدار ارمياسى اعىلۋدا. سوڭعىلارى ءۇشىن تالاپتار وڭتايلى: ەۋرازيالىق ەكونوميكالىق وداق ەلدەرىنىڭ ازاماتتارى ءۇشىن پاتەنت قاجەت ەمەس جانە زاڭدى تۇردە قالۋ مەرزىمى دە ۇزاعىراق. جەرگىلىكتى بيلىك جۇمىس كۇشىنىڭ جەتىسپەۋشىلىگىن ىشكى كوشى-قون ەسەبىنەن شەشۋگە دە ۇمىتتەنىپ وتىر.

رەسەي جۋرناليستەر وداعىنىڭ مۇشەسى يرينا نۋريەۆانىڭ ايماقتىق ب ا ق- تاردا جۇمىس ىستەگەن 20 جىلدىق ەڭبەك ءوتىلى بار. ءبىراق ۋفاداعى جالاقىسى 10 مىڭ رۋبل. ال قالادا جاتاقحانادا قىزمەت ىستەيتىن ايەل ودان ايلىقتى ءۇش ەسە ارتىق الادى. بۇعان قوسا، تاپقان تابىسىن شەتەلدىكتەر سياقتى دوللارعا ايىرباستاپ اۋرە بولمايدى، رۋبلمەن قارىشتايدى. شەتەلدىكتەر كەلەشەكتە رەسەيگە قايتا كەلىپ، تابىس تاباتىن مۇمكىندىك قايتا تۋاتىن شىعار دەگەن ۇمىتپەن داعدارىس جايلاعان ءولىارا كەزەڭدە ءوز وتانىنا ورالۋدى ءجون كورەدى.

www.24.kz