مۇقاعاليدىڭ ءدىن تۋرالى ولەڭدەرى
قايماعى بۇزىلماعان قايران ءدىنىم،
قايماعىڭ بىت-شىت بولدى قايدان بۇگىن؟!
قۇبىلاعا بەت الىپ قول قۋسىرىپ،
ساجدەگە جىعىلاتىن قايدا كۇنىم؟
ساتپايمىن، ساتقان ەمەن ءدىنىمدى مەن،
ولمەيتىن، وشپەيتۇعىن كۇنىم بىلەم.
تاپپايتىن كۇندە تىنىم، تۇندە تىنىم،
مۇسىلمان مۇحاممەدتىڭ ۇمبەتىمىن.
مۇحاممەدتىڭ ۇممەتى مۇسىلمانمىن،
پايعامبارىم قولدايدى قىسىلعان كۇن.
السىن تاعالام انت ەتەم، انت ەتەمىن،
اللا ەسىمىن جۇرەكتەن ۇشىرعان كۇن»
ءبارى راس ايتقانىنىڭ اق اللامنىڭ،
قۇممەنەن توپىراقتان جارالعانمىن.
قۇدايدىڭ قۇلىمىن مەن - مۇسىلمانمىن،
دەنەمدە ءتۇيىرى جوق ارام قاننىڭ،
اقيقاتىن اڭسايمىن اق ارماننىڭ.
مەكەنىم ءنىل داريا - مەككەم مەنىڭ،
كەلەدى ماڭگىلىككە مەكەندەگىم.
داريعا- اي زۇلپىھاردى ەرتتەپ ءمىنىپ،
كورمەگەن مەكەنىمە كەتەر مە ەدىم!
سەمسەرىن ازىرەت ءالى ەسكەك جاساپ،
جەرورتا تەڭىزىنەن وتەر مە ەدىم؟ !
قانى اققان قايران مەنىڭ مۇسىلمانىم،
وسى ما ەكى ورتادا قىسىلعانىڭ.
...بىرىگىڭدەر، الەمنىڭ مۇسىلمانى،
قۇربان بولسىن قۇدايىڭ ءۇشىن جانىڭ!!!
***
«اللا - اقيقات.
اللاعا سەنىپ وتەم،
ادالدىق پەن اقيقات سەرىگى ەكەن.
اداسپايمىن، اللاما سەنىپ وتەم،
ارامدىققا باسپايمىن - جولى بوتەن!»
***
ءيا، اللا! جاراتۋشى جالعىز يەم،
مەدەت بەر، جاپانداعى جالعىز ءۇي ەم!
حال سۇرار، جاي تۇسىنەر بىر پەندە جوق،
جۇرەك - ءجۇن، ويىم - وپات،
جاندى جۇيەم
***
«ءيا، اللا! جاراتۋشى جالعىز يەم،
مەدەت بەر، جاپانداعى جالعىز ءۇي ەم!
حال سۇرار، جاي تۇسىنەر ءبىر پەندە جوق،
جۇرەك- ءجۇن، ويىم- وپات، جاندى جۇيەم».
***
«جاراتۋشى، جالعىز يەم، قۋات بەر.
ازابىمدى- توزاعىمدى جەڭەيىن.
جاراتۋشى، جالعىز يەم شۋاق بەر،
وزىمە دە، وزگەگە دە توگەيىن»
***
مىنا دۇنيە ادىلدىكتەن جارالعان،
ءوز ورنىندا: جەر دە، كۇن دە، تاۋ، ورمان.
ءبىر- بىرىنەن قۋات العان، ءنار العان،
مىنا دۇنيە ادىلدىكتەن جارالعان.
كۇن بارادى ادىلدىگىن ارقالاپ،
ادىلدىگىن بولەپ جاتىر شارتاراپ.
ادىلدىك دەپ جۇرگەنىمىز بىزدەردىڭ -
بار عالامعا، الەمگە ورتاق سالتانات.
***
مىناۋ ءومىر ادىلدىكتىڭ تۇراعى،
مىناۋ دۇنيە ادىلدىكتەن تۇرادى.
ال ادام شە؟
ادام نەگە جىلادى؟ بىرەلەردەن بىرەۋ نەگە ىعادى؟
بىرەۋلەردىڭ ساعى نەگە سىنادى؟!
***
شىدا، شىدا
شىدا، شىدا!
شىداي ءتۇس، شىدا تاعى!
شىدامدىنى مىنا ءومىر ۇناتادى.
ءۇمىتتىڭ قۇلان يەك قۇلا تاڭى،
ايتەۋىر ءبىر اتادى، ءبىر اتادى...
وكىنبە، وكپەلەمە، بۇگىنىڭە
ءومىر، ءومىر!
بولمايدى تۇڭىلۋگە، ماڭگى سەنى جازباعان تۇڭىلۋگە،
قايتا تۇرىپ، قاقىڭ بار جۇگىرۋگە.
***
ءيا، اللام! جاراتۋشىم، قورعاۋشىم،
ءوزىڭ - ءومىر، ءوزىڭ - قۋات، قورعانسىڭ.
ءىشى ورتەنسىن، دۇشپاندارىم دولدانسىن،
دوستارىم كەپ دەمەسىن، ءبىر قولعا السىن.
ءيا، اللام! ادامدارعا قاس قىلما،
سورلى قىلما كوك اسپاننىڭ استىندا.
ءيا، اللام! جاۋىزدىقتان ساقتاي گور،
جاماندىققا، جاۋىزدىققا باستىرما!
***
ءدىن - عىلىمنىڭ اناسى
ءدىن - عىلىمنىڭ اناسى،
ءدىن - عىلىمنىڭ اكەسى.
عىلىم - ءدىننىڭ بالاسى،
ءدىن - عىلىمنىڭ كوكەسى.
عىلىم دا بار، ءدىن دە بار،
قوقىس تا بار، گۇل دە بار.
قول ۇستاسىپ قۇدايعا،
عىلىم مەن ءدىن بىرگە بار.
ازىرلەگەن بەيسەن سۇلتان ۇلى
