بۇدان بىلاي قازاقستاندىق ءسۇت جانە ەت ونىمدەرى ۆەتنامعا ەكسپورتتالماق

استانا. قازاقپارات - بۇل ەركىن ساۋدا ايماعىن قۇرعاننان كەيىن مۇمكىن بولماق.

بۇگىن سەناتورلاردىڭ الدىنا كەلگەن ۇلتتىق ەكونوميكا ءمينيسترىنىڭ ورىنباسارى تيمۋر جاقسىلىقوۆتىڭ ايتۋىنشا، ۆەتنام مەن ەۋرازيالىق ەكونوميكالىق وداق اراسىنداعى كەلىسىم وسى ەلگە ساۋدالاناتىن وتاندىق ونىمدەردىڭ كولەمىن ارتتىرۋعا جول اشپاق.

بۇگىنگى تاڭدا ەكى ەل اراسىنداعى تاۋار اينالىمى 205 ميلليون دوللاردى قۇراسا، ونىڭ بار بولعانى 10 ميلليونى عانا ەكسپورتقا تيەسىلى. ال ۆەتنامنان بىزگە تۇرمىستىق تەحنيكا، ەلەكتورنيكا جانە كيىم- كەشەك اكەلىنەدى. كەلىسىم اياسىندا يمپورتتىق باج سالىعىن مۇلدەم الىپ تاستاۋ كوزدەلگەن، بۇل ءوز كەزەگىندە رەسپۋبليكالىق بيۋدجەت ءتۇسىمىن شامامەن 458 ملن تەڭگەگە ازايتادى دەپ كۇتىلۋدە.

تيمۋر جاقسىلىقوۆ، ق ر ۇلتتىق ەكونوميكا ۆيتسە-ءمينيسترى:

- ءبىز نە نارسەدەن شىعىن كورەمىز؟ ەڭ الدىمەن تاۋارلاردىڭ كەيبىر تۇرىنە يمپورتتىق باج سالىعىن الىپ تاستاپ وتىرمىز، سوندىقتان سالىق ءتۇسىمى ازايدى. الايدا ءبىز ۇتىلمايمىز. ويتكەنى ءبىزدىڭ تاۋارلار دا باج سالىعىنسىز ەكسپورتتالادى. كاسىپكەرلەرىمىز ەكسپورت كولەمىن ارتتىرىپ، تابىستارىن ەسەلەۋگە مۇمكىندىك الادى.

اسحات كۇزەكوۆ، ق ر پارلامەنتى سەناتىنىڭ دەپۋتاتى:

- ءبىزدىڭ ەكسپورت ۆەتنامعا بارعاندا ول دا كەدەننىڭ نولدىك ستاۆكاسىمەن باراتىن بولادى. ونىڭ ىشىندە ءبىزدىڭ اۋىلشارۋاشىلىق تاۋارلارىمىز، بيدايىمىز، ۇنىمىز، سيىردىڭ ەتى وندا ارزان تۇرىمەن بارادى دا، ءبىزدىڭ تاۋارعا سۇرانىم جوعارى بولادى. سوندىقتان دا ءبىزدىڭ كاسىپكەرلەرگە ۇلكەن كومەك، جەڭىلدىك بولىپ تابىلادى.

www.24.kz