شىمكەنتتە وقۋشىلار قول پروتەزىن جاساپ شىقتى

استانا. قازاقپارات - شىمكەنتتەگى نازاربايەۆ زياتكەرلىك مەكتەبى وقۋشىلارى قۇراستىرعان روبوتتارى مۇمكىندىگى شەكتەۋلى جاندارعا كومەگىن تيگىزەدى.

فيزيكا-ماتەماتيكا پاندەرىن تەرەڭدەتىپ وقىتاتىن ءبىلىم ۇياسىنىڭ شاكىرتتەرى بولاشاقتا ءتىپتى وزدىگىنەن ءجۇرىپ تۇرا المايتىن جاندارعا ارناپ، سويلەي الاتىن روبوت تا قۇراستىرماق، دەپ جازادى 24.kz.

جاس ونەرتاپقىشتار Lego ويىنشىقتارىنان قول پروتەزىن دە جاساپ شىعىپتى. ونىڭ تەمىرگە قاراعاندا سالماعى جەڭىل ءارى يىلگىش كەلەدى. تاعى ءبىر ەرەكشەلىگى جاساندى قولدى، ادامنىڭ بۇلشىق ەتىنە وپەراتسيا جاساپ ورناتۋدىڭ قاجەتى جوق. تەك ارنايى سەنسوردىڭ كومەگىمەن ميعا نە جۇيكە جۇيەسىنە جالعاسا بولعانى. ادامنىڭ سۋ ىشكىسى كەلىپ، اۋزى قۇرعاعاندا قول روبوت اۆتوماتتى تۇردە وزدىگىنەن ستاقانمەن سۋ بەرەدى. تىڭ تۋىندىلارىن تاۋەلسىزدىكتىڭ 25 جىلدىعىنا ارناعان جاس ونەرتاپقىشتار بۇل روبوتتار مۇگەدەك جانداردىڭ قوعامنان شەت قالماۋىنا كومەكتەسەتىنىنە سەنىمدى.

«بۇل روبوتتار تەك قانا فيزيكالىق تۇرعىدان كومەكتەسىپ قانا قويماي، پسيحولوگيالىق تۇرعىدان دا كومەكتەسە الادى. ەگەر وعان داۋىس سەنسورلارىن قوياتىن بولساق، ولار سويلەي الادى جانە ادامدارعا رۋحاني قولداۋ كورسەتىپ وتىرادى»، - دەيدى فيزيكا-مەتەماتيكا باعىتىنداعى نازاربايەۆ زياتكەرلىك مەكتەبىنىڭ وقۋشىسى ابىلاي ءىلياسوۆ.