ەۋروپا قالالارىن قويۋ ءتۇتىن تۇمشالاپ تۇر

استانا. قازاقپارات - ەۋروپا قارا ءتۇتىندى كوپ شىعاراتىن اۆتوكولىكتەردىڭ قالا كوشەلەرىندە جۇرۋىنە رۇقسات بەردى.

زاڭ بويىنشا پايدالانىلعان گازدىڭ شىعۋ مولشەرى ارتتىرىلدى. بۇل قادامعا ولار Volkswagen كانتسەرنىنىڭ سىرى اشكەرەلەنگەننەن كەيىن باردى. جاڭا اۆتوكولىكتەر دە اۋانى لاستاۋ تالابىنا سايكەس كەلمەيدى. سوندىقتان ەۋروپا اۆتووندىرىسشىلەرگە جەڭىلدىك جاسادى. الايدا ۇلكەن قالالار كوك تۇتىنگە بۋلىققان. ءتىپتى يتاليا استاناسىنىڭ تۇرعىندارى ەسىك- تەرەزەلەرىن اشۋدان قالدى. يتاليا استاناسىنىڭ اسپانى كوك تۇتىننەن كوز اشپاعانىنا ەكى اي بولدى. اۋانىڭ لاستانۋى قالىپتى مولشەردەن بىرنەشە ەسەگە ارتىق. بۇل جەردە ەڭ باستى قاۋىپ اۆتوكولىكتەن. ريمدا 1,5 ميلليوننان استام كولىك بار. سونداي- اق يتاليانىڭ جەكەمەنشىك اۆتوكولىك پاركى -  ەۋروپاداعى ەڭ ەسكىلەرىنىڭ ءبىرى.

ال ريمدىقتار -  گازەت الۋعا دا كولىكپەن بارۋدى داعدىعا اينالدىرعاندار. قالالىق اكىمشىلىكتىڭ بيىلعى قىستاعى باستى پروبلەماسى تۇمشالاعان ءتۇتىن بولدى. بيلىك وكىلدەرى جەر ۇيلەردەگى پەشتى از قولدانۋعا، الاۋوشاقتاردى جاعۋعا مۇلدەم تيىم سالدى. ال مەترو بيلەتتەرىن جەڭىلدىكپەن ساتىپ، كولىكتەر قوزعالىسىنا شەكتەۋ جاسالدى. ءبىراق ەش ناتيجە جوق.

تۇرعىن:

- ۆەلوسيپەدپەن جۇرۋگە دە بولادى. الايدا تاياق تاستام جەردىڭ وزىنە بارلىعى كولىكپەن بارادى. ىنتا بولسا اۆتوكولىكتەن دە باس تارتۋعا بولادى.

تۇرعىن: - ءىرى قالالاردا قوعامدىق كولىك جەلىسى بولسا بۇل پروبلەمانى شەشۋگە جاردەم بولۋشى ەدى. وكىنىشكە قاراي، ريمدە ونداي جوق بولعاندىقتان ادامداردىڭ بارلىعى اۆتوكولىككە وتىرادى.

اۋانىڭ لاستانۋىنا قاراماستان، ەۋروپارلامەنت دەپۋتاتتارى اۆتوكولىكتەن شىعاتىن گازدىڭ مولشەرىن ۇلعايتۋدى ۇيعاردى. بۇرىن قالىپ بويىنشا 1 شاقىرىم جەرگە 80 ميلليگرامم ازوت توتىعى اۋاعا تارالۋعا رۇقسات ەتىلسە، ەندى ونىڭ مولشەرى ەكى ەسەگە ۇلكەيدى. Volkswagen توڭىرەگىندەگى داۋ- داماي اۆتوكونتسەرندەر كولىكتەرىنەن شىعاتىن گازدىڭ مولشەرىن دۇرىس كورسەتپەي جۇرگەنىن دالەلدەدى. ەكولوگتار تەمىر تۇلپارلارىنا بۇرىنعى تالاپتاردى ساقتاپ قالۋعا شاقىرسا دا، ۇكىمەت بۇل ماسەلەدە ءىرى وندىرۋشىلەرگە قۇلاق اسۋدى قالاعان.

دجوۆانني لا ۆيا، ەۋروپارلامەنتتىڭ قورشاعان ورتانى قورعاۋ جونىندەگى كوميتەتتىڭ ءتوراعاسى: - نەگىزىندە اۆتوكولىكتەر جولدا زياندى زاتتاردى وندىرۋشىلەردىڭ ايتقانداي ەمەس، ودان 4-5 ەسەگە كوپ شىعارادى. ءبىز بەكىتكەن جاڭا نورما بويىنشا يندۋستريا كولىكتەن شىعاتىن گازدىڭ مولشەرىن ازايتۋعا جۇمىس ىستەيتىن بولادى. جىلدام بولماسا دا، جوسپارعا ساي ورىندالادى. ەۋروپا مەملەكەتتەرىندە جىل سايىن اۋانىڭ لاستانۋىنا بايلانىستى اۋرۋلاردان 400 مىڭ ادام كوز جۇمادى. 2050 -جىلعا قاراي ەكونوميكالىق ىنتىماقتاستىق جانە دامۋ ۇيىمىنىڭ ەسەبى بويىنشا بۇل ساندار ەكى ەسەگە ءوسۋى مۇمكىن. ال يتاليادا ءتۇتىن تۇمشالاعان قالالاردىڭ سانى بۇگىندە 48.

www.24.kz