ماجار حالقىنىڭ ەرتەگىلەرى قازاقشاعا اۋدارىلدى - فوتو
بۇل تۋرالى بۇگىن تۇركى اكادەمياسىنىڭ ۆەنگريانىڭ قازاقستانداعى ەلشىلىگىمەن بىرلەسىپ وتكىزگەن دوڭگەلەك ۇستەلدە جاريا ەتىلدى.
باسقوسۋعا ۆەنگريا تاراپىنان قازاقستانداعى توتەنشە جانە وكىلەتتى ەلشى اندراش باراني، ازەربايجاننىڭ قازاقستانداعى ەلشىسى راشاد مامەدوۆ، ق ر سىرتقى ىستەر مينيسترلىگىنىڭ وكىلدەرى، سونىمەن قاتار ۆەنگريانىڭ قازاقستانداعى كونسۋلى شاندور دوروگي، ۆەنگريا ەلشىلىگىنىڭ اتتاشەسى پەتەر سەدەركەني، تۇركى كەڭەسى اقساقالدار كەڭەسىنىڭ مۇشەسى ءادىل احمەتوۆ، پروفەسسور بولات كومەكوۆ، جازۋشى، مەملەكەتتىك سىيلىقتىڭ لاۋرەاتى تولەن ابدىك، كورنەكتى عالىم ديحان قامزابەك ۇلى، كاسىپكەر، مەسەنات ساپار ىسقاقوۆ جانە باسقا قازاقستاندىق كورنەكتى تۇركىتانۋشى عالىمدار مەن قوعام قايراتكەرلەرى قاتىستى.
«جيىندى اشقان تۇركى اكادەمياسىنىڭ باسشىسى دارحان قىدىرءالى ماجار عالىمدارىنىڭ تۇركىتانۋ عىلىمىنا قوسقان ۇلەسى مەن تىڭ ىزدەنىستەرىن اتاپ ءوتىپ، ەكى ەل اراسىنداعى تاريحي- مادەني بايلانىستاردىڭ ماڭىزدىلىعىنا توقتالدى»، دەلىنگەن اتالمىش اكادەميانىڭ باسپا ءسوز قىزمەتى تاراتقان اقپاراتتا.
سونداي- اق، د. قىدىرءالى جيىن بارىسىندا كوپشىلىككە اكادەميا تاراپىنان ازىرلەنگەن 3 جاڭا باسىلىمدى: ايگىلى تۇركىتانۋشى يشتۆان قوڭىر ماندوكي ەڭبەكتەرىنەن «New comers from the east. Hungarians and Kipchak-Turks in Europe» («شىعىستان قونىستانۋشىلار. ماجارلار مەن ەۋروپاداعى قىپشاق- تۇركىلەر» ) اتتى عىلىمي جيناقتى، كورنەكتى ماجار عالىمى لازلو ماراتستىڭ «Towards Eurasian Linguistic isoglosses: the case of Turkic and Hungarian» («تۇركىلەر مەن ماجارلاردىڭ مىسالىندا ەۋرازيالىق ءتىل كەڭىستىگى» ) كىتابىن جانە «ماجار حالقىنىڭ اڭىزدارى مەن ەرتەگىلەرىن» تانىستىردى.
العاشقى ەكى عىلىمي ەڭبەك اعىلشىن تىلىندە جاريالانسا، سوڭعىسى تۇڭعىش رەت ماجار تىلىنەن قازاق تىلىنە تىكەلەي اۋدارىلۋىمەن قۇندى. ماجار حالقىنىڭ اڭىزدارى مەن ەرتەگىلەرىن قازاق تىلىنە ءتارجىمالاعان سەگەد ۋنيۆەرسيتەتىنىڭ وقىتۋشىسى راۋشانگۇل مۇقىشەۆا.
سونىمەن قاتار، اكادەميانىڭ كىتاپحاناسىندا وتكەن شارا اياسىندا ماجار تۇركىتانۋشىلارىنا ارنالعان تانىمدىق كورمە ۇيىمداستىرىلىپ، دەرەكتى فيلم كورسەتىلدى.
