تارازدا ءتىسىن ەمدەتپەك بولعان ايەل دارىگەرلەردىڭ سالعىرتتىعىنان وزگە دەرتكە شالدىققان
بۇل تۋرالى Stan.kz سايتىنىڭ تارازداعى ءتىلشىسى حابارلايدى.
قاراتاۋ قالاسىنىڭ تۇرعىنى شولپان بايتيكوۆا ءتىسى اۋىرىپ مازا بەرمەگەن سوڭ، تاراز قالاسىنداعى «دەنتا- سەرۆيس» ءتىس ەمحاناسىنا قارالۋعا بارعان.
ءتىس دارىگەرى باۋىرجان سالىبايەۆ ونىڭ ءتورت ءتىسىن بىردەن ەمدەمەك بولادى. الايدا، شولپان بايتيكوۆا تەك ەكى ءتىسىن ەمدەتۋگە كەلىسەدى.
باعدات تۇرىمقۇلوۆ ەسىمدى دارىگەر الدىن الا سىناق جاساماستان بىردەن ەكپە سالعان. سول ساتتە الدىن الا تەكسەرىلمەگەن ەكپەنىڭ سالدارى مەن دارىگەرلەردىڭ سالعىرتتىعىنان شولپانعا دەم جەتپەي، قاتتى قىسىلادى دا، دارىگەرلەر ايەلدى سىرتقا الىپ شىعىپ، قايتا ىشكە كىرگىزەدى. العاشقى جاردەم كورسەتۋگە دە جاراماعان دارىگەرلەر جانى قينالعان ايەلگە «انە- قويادى، مىنە- قويادى» دەۋمەن بەتىنە قاراپ وتىرا بەرگەن.
جارتى ساعاتقا جۋىق ۋاقىتتان كەيىن ايەلدىڭ بەتى بەرى قاراماسىنا كوزدەرى جەتكەن سوڭ، قوڭىراۋ شالىپ، جەدەل جاردەم قىزمەتىن شاقىرادى. جەدەل جاردەم شولپاندى №2 قالالىق اۋرۋحانانىڭ جان ساقتاۋ بولىمە جاتقىزادى. اۋرۋحانا دارىگەرلەرى ايانباي ات سالىسىپ، ايەلدى ءبىر اپتا سول اۋرۋحانادا ەمدەيدى.
№2 اۋرۋحانا دارىگەرلەرىنىڭ قورىتىندىسى بويىنشا ايەلگە «ۋبيستەزين» ەكپەسىنەن اللەرگيالىق رەاكتسيا بەرگەن ەكەن. سوندىقتان ءى دارەجەدەگى انافيلاكسيالىق شوك دياگنوزى قويىلعان. ءتىس ەمدەتەمىن دەپ، وزگە دەرتكە شالدىققان ايەل اۋرۋحانادان شىعا سالا تاراز قالالىق ىشكى ىستەر باسقارماسىنا «دەنتا- سەرۆيس» ءتىس ەمحاناسىنىڭ سالعىرتتىعىن ايتىپ ارىز جازعان.
«ارىزىمدى تەرگەۋشى نازگۇل جامپوزوۆا قابىلدادى. مەنىڭ ءبىر بىلەرىم دەنىم ساۋ ەدى. مىنە، كۇنى بۇگىنگە دەيىن بىرنەشە رەت ۇستاما ۇستاپ، اياق قولىم تىرىسىپ، دىرىلدەپ، اۋا جەتپەي قۇلادىم. الايدا، جامپوزوۆا ارىزىمدى اياقسىز قالدىرعان سوڭ، دەنساۋلىق ساقتاۋ مينيسترلىگىنە، ىشكى ىستەر مينيسترلىگىنە بولعان جايدى ايتىپ ارىزداندىم. كەيىن «جامپوزوۆا ىسىنە سالعىرت قاراعانى ءۇشىن جازالاندى» دەگەن حات الدىم»، - دەيدى شولپان بايتيكوۆا.
الايدا، بۇعان سەنبەگەن شولپان تاراز قالالىق ىشكى ىستەر باسقارماسىنا قايتا ارىزدانعان. بۇل جولى ونىڭ ءىسىن جانىبەك سىدىقوۆ قولعا العان. ول ءار كەز قوڭىراۋ شالعان سايىن كۇتە تۇرۋ كەرەكتىگىن ءوتىنىپ، ءتۇرلى سىلتاۋلار ايتقان.
ال، قىركۇيەكتىڭ 17 -كۇنى تاراز قالالىق ىشكى ىستەر باسقارماسىنىڭ شەشىمى شولپاننىڭ قولىنا تيەدى.
شەشىمدە شولپان بايتيكوۆانىڭ دەنساۋلىعىنا ەشقانداي زالال كەلتىرىلمەگەنى جازىلعان.
قالالىق ىشكى ىستەر باسقارماسىنىڭ تەرگەۋشىسى نازگۇل جامپوزوۆا شولپان العاش رەت ارىز جازعاندا وعان قانشا قاراجات كەرەكتىگىن سۇراعان ەكەن. شولپان اقشادان باس تارتقان. ءتىپتى، ءتىس دارىگەرلەرى باۋىرجان سالىبايەۆ پەن باعدات تۇرىمقۇلوۆ شولپاننىڭ كۇيەۋىنە جولىعىپ، 50 مىڭ تەڭگە ۇسىنعان كورىنەدى. الايدا، جولداسى دا ول اقشادان باس تارتىپ، وعان اقشا ەمەس ايەلىنىڭ دەنساۋلىعى ماڭىزدى ەكەنىن، ونى ەمدەتۋ كەرەكتىگىن ايتقان. ءبىراق، وعان كونبەگەن دارىگەرلەر سوتقا ارىزدانا بەرىڭدەر دەپ كەتىپ قالعان.
«مەن جۇمىسسىزبىن. اۋرۋحانا جاعالاپ، اۋرۋ بولىپ وتىرعانىم مىناۋ. ءۇش بالام بار. ماعان اقشا ەمەس، دەنساۋلىق قاجەت. ساپ- ساۋ ەدىم، سول وقيعادان كەيىن ءجيى قۇلاپ قالاتىن تالما اۋرۋىنا شالدىقتىم. ءوز قاراجاتىممەن الماتى قالاسىنداعى «يممۋنو- دياگنوستيكا» لابوراتوريالىق ورتالىعىنا بارىپ اللەرگو- تەست تاپسىردىم. تەست ناتيجەسى «تەرىس» دەپ شىقتى. مەنى مەديتسينالىق تەكسەرىستەن وتكىزبەستەن سىرتىمنان شەشىم شىعارا سالعاندارىنا تاڭمىن»، - دەيدى ارىزدانۋشى ايەل.
«ستوماتولوگيالىق ورتالىقتان دەنساۋىعىنا ەشقانداي زيان كەلمەگەن» دەگەن دەگەن قۇزىرلى ورگاندارىنىڭ جاۋاپتارىنا تاڭمىن. ماعان ەشقانداي دا سىناق جاسالعان جوق. ەكپەنى بىردەن سالدى. مەنىڭ دەنساۋلىعىما جاۋاپتى ادامدار ءالى دە مەديتسينا سالاسىندا ءجۇر. بۇگىن مەنى دەرتتى قىلسا، ەرتەڭ سىزگە دە زيانى ءتيۋى مۇمكىن ەمەس پە؟ مەنى ەمدەتىڭدەر دەگەنىم ءۇشىن جازىقتىمىن با؟ ادىلدىك قايدا؟»- دەيدى 34 جاستاعى شولپان.
شولپان ءوز اقشاسىنا الماتى قالاسىنداعى لابوراتوريالىق ورتالىققا دا تەكسەرىلىپ كورگەن ەكەن. وندا دا دەنساۋلىعىندا كىنارات بارى انىقتالعان. سوندىقتان شولپان قىزمەتىنە جاۋاپسىز قاراعان دارىگەرلەردىڭ ءالى دە مەديتسينا سالاسىندا جۇمىس ىستەپ جۇرگەنىنە، قۇزىرلى ورگانداردىڭ ونىڭ دەنىن ساۋ دەپ شەشىم شىعارعانىن تۇسىنە الماي دال.
يستوچنيك: Stan.kz
