فۋتزالدان ەۋروپا چەمپيوناتى: قازاقستان قۇراماسى العاشقى كەزدەسۋىندە رەسەيلىكتەرگە ەسە جىبەردى
الەمدىك رەيتينگتە ءۇشىنشى ساتىدا تۇرعان رەسەي دۇنيە جۇزىندەگى مىقتى كوماندالاردىڭ ءبىرى بولسا، نەبارى 15- ورىنداعى قازاقستاندىقتار ەۋروپا بىرىنشىلىگىنە تۇڭعىش رەت قاتىسۋدا.
الما-كەزەك شابۋىلمەن وربىگەن ماتچتىڭ ءبىرىنشى كەزەڭىنىڭ ورتا تۇسىندا الاڭعا شىققان رەسەيلىك دميتري لىسكوۆتىڭ ەكى مارتە ءدال پاسىنان كەيىن رومۋلو قازاقستان قۇراماسىنىڭ ەسىن جيعىزباستان، ەسەپتى ءبىر-اق مينۋتتىڭ ىشىندە 2:0 گە جەتكىزدى. بۇدان سوڭ قازاقستاندىقتاردىڭ باس باپكەرى كاكاۋ تايم-اۋت الىپ، شاكىرتتەرىنە دەر كەزىندە اقىل-كەڭەسىن بەردى. وسىدان كەيىن قاقپاشى يگيتا دا العا شىعىپ، ونىڭ قاتتى سوققىسىنان كەيىن 13-مينۋتتا قازاقستان قۇراماسىنىڭ ويىنشىسى سەرىك جامانقۇلوۆ ەسەپتى قىسقارتتى. بۇل - قازاقستاندىقتاردىڭ ەۋروپا چەمپيوناتىندا سوققان العاشقى گولى.
ەكىنشى تايمدا قارسىلاستاردىڭ بىرنەشە مارتە گول سوعاتىن مۇمكىندىكتەرى بولعانىمەن، ەسەپ وزگەرگەن جوق.
C توبىندا ونەر كورسەتەتىن قازاقستاندىقتار كەلەسى ويىنىن 5- اقپان كۇنى الەمدىك رەيتينگتە وزىنەن كەيىن 16-ورىندا كەلە جاتقان حورۆاتيا كومانداسىمەن وتكىزەدى. ءار توپتا ءۇش كوماندا بولسا، سونىڭ ەكەۋى 13- اقپانعا دەيىن سوزىلاتىن جارىستى جالعاستىرادى. سوندىقتان قازاقستان قۇراماسىنا حورۆاتيانى قالايدا جەڭۋ قاجەت.
اۆتور: ەلجان ەرالى
