ەلباسى جارلىعىمەن قازاقستان قارۋلى كۇشتەرىنىڭ جالپى اسكەري جارعىلارىنا وزگەرىستەر ەنگىزىلدى
ق ر قاۋىپسىزدىك كەڭەسىنىڭ اسكەري قاۋىپسىزدىك جانە قورعانىس ءبولىمى «قازاقستان رەسپۋبليكاسى قارۋلى كۇشتەرىنىڭ، باسقا دا اسكەرلەرى مەن اسكەري قۇرالىمدارىنىڭ جالپى اسكەري جارعىلارىن بەكىتۋ تۋرالى» قازاقستان رەسپۋبليكاسى پرەزيدەنتىنىڭ 2007 جىلعى 5 شىلدەدەگى №364 -جارلىعىنا وزگەرىستەر ەنگىزۋ تۋرالى» قازاقستان رەسپۋبليكاسى پرەزيدەنتىنىڭ 2016 -جىلعى 2 -اقپانداعى № 187 -جارلىعىنا تۇسىندىرمە جاريالادى.
تۇسىندىرمەدە وسى جارلىق مەملەكەت باسشىسىنىڭ تاپسىرماسىنا سايكەس، سونداي-اق قولدانىستاعى زاڭنامانىڭ وزگەرۋىنە جانە كۇشتىك قۇرىلىمداردىڭ قايتا ۇيىمداستىرىلۋىنا بايلانىستى ازىرلەنگەندىگى اتاپ وتىلگەن.
ىشكى قىزمەت جارعىسى، گارنيزوندىق جانە قاراۋىلدىق قىزمەتتەر جارعىسى، تارتىپتىك جارعى جاڭا رەداكسيادا جازىلدى.
ىشكى قىزمەت جارعىسىندا اسكەري قىزمەتشىلەردىڭ جالپى قۇقىقتارى مەن مىندەتتەرى جانە قارۋدى قولدانۋ ءتارتىبى كەلتىرىلگەن. ول ىشكى ءتارتىپتى، اسكەري قىزمەتشىلەردىڭ جالپى قۇقىقتارىن، مىندەتتەرىن، نەگىزگى لاۋازىمدى ادامداردىڭ مىندەتتەرىن ايقىندايدى.
گارنيزوندىق جانە قاراۋىلدىق قىزمەتتەر جارعىسىندا گارنيزوندىق جانە قاراۋىل قىزمەتتەرىن ۇيىمداستىرۋ مەن اتقارۋدىڭ، گارنيزوندىق ءىس- شارالار وتكىزۋدىڭ ءتارتىبى ايقىندالعان. جاڭا رەداكتسيادا گارنيزون باستىقتارىنىڭ وكىلەتتىكتەرى مەن جاۋاپكەرشىلىگى كەڭەيتىلگەن.
كەلەسى ءبىر تولىقتىرۋ قىلمىستىق- اتقارۋ زاڭناماسى شەڭبەرىندە ارەكەت ەتەتىن ۇلتتىق سىندارلى تەتىك قاتىسۋشىلارى مەن قوعامدىق- باقىلاۋ كوميسسيالارى مۇشەلەرىنىڭ گاۋپتۆاحتالاردى تەكسەرۋدى جۇزەگە اسىرۋىنا رۇقسات ەتۋ بولىپ تابىلادى.
اسكەري قىزمەتشىلەردى جەرلەۋ جانە اسكەري قۇرمەت تۇتۋ راسىمدەرى دە ناقتىلاندى.
تارتىپتىك جارعىدا اسكەري ءتارتىپ ۇعىمى مەن ونىڭ ءمانى، اسكەري قىزمەتشىلەردىڭ اسكەري ءتارتىپتى ۇستانۋداعى مىندەتتەرى، ىنتالاندىرۋلاردىڭ، تارتىپتىك تەرىس قىلىقتار مەن تارتىپتىك جازالاردىڭ تۇرلەرى، قىزمەتتىك تەرگەپ- تەكسەرۋ جۇرگىزۋدىڭ ءتارتىبى، اسكەري قىزمەتشىلەردى جاۋاپتىلىققا تارتۋدىڭ ءتارتىبى ايقىندالدى.
ساپتىق جارعى ازداپ وزگەرىستەرگە ۇشىرادى، وندا ساپتا ءجۇرىپ- تۇرۋ قيمىلدارىنا قويىلاتىن تالاپتار وزگەردى. وسىعان سايكەس ساپتىق پلاتستاعى ساپتىق الاڭدى بەلگىلەپ سىزۋ وزگەرتىلدى.
تۇتاس العاندا، جارلىقتى ىسكە اسىرۋ قارۋلى كۇشتەر مەن باسقا دا اسكەري قۇرالىمداردىڭ قىزمەتىن زاڭناماعا سايكەس كەلتىرىپ، ەلدىڭ قورعانىس قابىلەتىن نىعايتۋعا مۇمكىندىك بەرەدى.
