ەلەكتروندى ساۋدادا باعا تەك تەڭگەمەن بەلگىلەنەدى

استانا. قازاقپارات - ەلىمىزدە ەلەكتروندى ساۋدا جاساۋ ەرەجەلەرىنىڭ وزگەرۋى ءتۇرلى سالالاردىڭ نارىعىنا جاعىمدى اسەر ەتەدى.

وتاندىق ساراپشىلاردىڭ پىكىرى وسى. ەسكە سالا كەتەيىك، 2 -اقپاننان باستاپ عالامتوردا تاۋارلار مەن كورسەتىلگەن قىزمەتتەر باعاسى ەندى تەك ۇلتتىق ۆاليۋتامەن كورسەتىلۋى ءتيىس. قازىرگى تاڭدا ەكونوميكانى دوللارسىزداندىرۋ ماسەلەسى كوپتەگەن مەملەكەتتىڭ قارجى سالاسىنىڭ كۇن تارتىبىندە تۇر.

بۇل تۇيتكىلدەن قازاقستان دا شەت قالعان جوق. ءبىر جىل بۇرىن ۇكىمەتتىڭ كەڭەيتىلگەن وتىرىسىندا پرەزيدەنت ەل ىشىندە قارجىلاي وپەراتسيالاردى تەك تەڭگەمەن جۇرگىزۋدى تاپسىرعان بولاتىن. وسىعان وراي ۇلتتىق ەكونوميكا مينيسترلىگى ەلەكتروندى ساۋدانى ۇلتتىق ۆاليۋتامەن عانا جۇزەگە اسىرۋ تۋرالى بۇيرىق شىعاردى. بۇل شەشىم نەگىزىنەن تۇرعىن ءۇي مەن كولىك نارىعىنا قاتىستى بولىپ تۇر. ويتكەنى ءدال وسى سالالاردا ادامدار شەتەل ۆاليۋتاسىمەن ەسەپ ايىرىسۋعا ۇيرەنگەن.

قازاقستاننىڭ ريەلتورلار قاۋىمداستىعىنىڭ پرەزيدەنتى ەلەنا گريۆانىڭ ايتۋىنشا، بۇل جاڭاشىلدىق ەل اراسىندا ەشقانداي الاڭداۋشىلىق تۋعىزعان جوق.

ەلەنا گريۆا، قازاقستان رەلتورلارى قاۋىمداستىعىنىڭ پرەزيدەنتى:

- ەندى ءبىزدىڭ نارىقتا تۇراقتىلىق ورنايدى. ءبىز ءۇشىن بۇل -  كوپتەن كۇتكەن وزگەرىس. ساتۋشىلار دا، ساتىپ الۋشىلار دا دوللار باعامىنىڭ اۋىتقۋلارىنا قارامايتىن بولدى. كورشى رەسەي ەلىندە بۇل تاجىريبە ءساتتى جۇزەگە اسىرىلىپ جاتىر. سوڭعى ەكى كۇن ىشىندە ماعان وسى ماسەلە بويىنشا بىردە- ءبىر ادام حابارلاسىپ، نارازىلىق بىلدىرگەن جوق. مەنىڭشە، حالىق تەڭگەمەن ەسەپ ايىرىسۋعا دايىن بولدى.

كولىك ساتۋ تۋرالى جارنامالاردى جاريالايتىن سايتتاردىڭ باسىم بولىگى دە تاۋار قۇنىن دوللارمەن نەمەسە رۋبلمەن كورسەتەتىن. بۇيرىق شىققان بەتتە بۇل پورتالداردا تەمىر تۇلپارلاردىڭ باعا كورسەتكىشتەرى وزگەردى. تۇتىنۋشىلارعا ىڭعايلى بولۋى ءۇشىن شەتەلدىك ۆاليۋتامەن بەلگىلەنگەن باعا اۆتوماتتى تۇردە تەڭگەگە اۋىستىرىلادى. اۆتوكولىك نارىعىن تۇراقتاندىرۋ ءۇشىن بۇل تاپتىرماس شەشىم.

اندرەي لاۆرەنتيەۆ، قازاقستاندىق اۆتوبيزنەس قاۋىمداستىعىنىڭ پرەزيدەنتى:

- ءبىز دوللاردان باس تارتۋ تۋرالى شەشىمدى تولىعىمەن قولدايمىز. حالىقتىڭ ەسەپ ايىرىسۋ مەنتاليتەتىن وزگەرتۋ قاجەت. بىرىنشىدەن، ەندى كولىكتى ساتىپ الۋ كەزىندە ادامداردا الاڭداۋشىلىق بولمايدى. كولىك ساتاتىن سالوندار ءۇشىن دە بۇل جاقسى جاڭاشىلدىق بولدى. ەكىنشىدەن، حالىقتىڭ ۇلتتىق اقشامىزعا دەگەن قۇرمەتى ارتادى.

ۇلتتىق ۆاليۋتانىڭ بەدەلىن ودان ءارى ارتتىرۋ ءۇشىن وتاندىق ءونىمدى پايدالانۋىمىز كەرەك. تەك يمپورت كولەمىن تومەندەتۋ ارقىلى عانا دوللارعا دەگەن سۇرانىستى ازايتۋعا بولادى. ساراپشى ساپارباي جوبايەۆتىڭ پىكىرى وسىعان سايادى.

ساپارباي جوبايەۆ، ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «قارجى» كافەدراسىنىڭ اعا وقىتۋشىسى:

- ترانسۇلتتىق كومپانيالار دا وسى باعىتتى كوبىرەك جۇزەگە اسىرۋى كەرەك. سەبەبى، ولار قاي مەملەكەتتەن كەلسە، ول كومپانيا ءوز تاۋارىن، ءوز جۇمىسشىلارىن اكەلۋگە ارەكەت جاسايدى. سوندا ءبىز ولارعا شەتەلدىك ۆاليۋتادا تولەۋىمىز كەرەك. مەنەدجمەنتىن اكەلەتىن بولسا، ءبىز مەرچەندايزينگ، فرانچايزينگتى ازايتىپ، اسىرەسە، مەملەكەتتىك ساتىپ الۋدا تەك تەڭگەمەن جۇمىس ىستەيتىن كومپانيالارمەن جۇمىس ىستەپ، سولارعا شارت قويۋ كەرەك.

ۇلتتىق ۆاليۋتامىزدى نىعايتۋ جولىندا ءبىرقاتار باتىل قادامدار جاسالدى. ەندى ءىرى كاسىپورىندار دا كەلىسىمشارتتاردى تەڭگە ارقىلى جۇرگىزۋى ءتيىس.

www.24.kz