استانا- وسكەمەن اۆتوبۋسىنىڭ جۇرگىزۋشىسى ۇرىنى ۇستاپ بەردى

پاۆلودار. قازاقپارات - قاڭتار ايىنىڭ سوڭعى كۇنى ەكىباستۇز پوليتسياسىنىڭ قىزمەتكەرلەرى «استانا- وسكەمەن» قالاارالىق اۆتوبۋسى جۇرگىزۋشىسىنىڭ كومەگىمەن قوعامدىق كولىكتە ءۇش جولاۋشىدان 240 مىڭنان استام تەڭگە ۇرلاعان اقتوعاي اۋىلىنىڭ 32 جاستاعى تۇرعىنىن ۇستادى، دەپ حابارلادى پاۆلودار وبلىستىق ءى ءى د-نىڭ باسپا ءسوز قىزمەتىنەن.

ساعات تۇنگى ەكىلەردە كولىكتەگى جولاۋشىلاردىڭ ءبىرى 120 مىڭ تەڭگە اقشاسىن جوعالتقانىن ايتقان. اۆتوبۋستىڭ جۇرگىزۋشىسى شىدەرتى كەنتىنە جاقىنداعاندا پوليتسەيلەردى شاقىرتىپ، ولار كەلگەنشە ەشكىمدى تىسقا شىعارماعان. جولاۋشىلاردى سۇراۋ كەزىندە تاعى ەكى جابىرلەنۋشىنىڭ بار ەكەنى، ولاردان 120 مىڭنان استام تەڭگە ۇرلانعانى انىقتالعان.

جولاۋشىلاردىڭ ءبىرى اۆتوبۋس كەلە جاتقاندا بىرنەشە رەت ورىن اۋىستىرعانى بەلگىلى بولدى. كۇدىكتى جولاۋشىلاردىڭ اراسىندا ۇيىقتاپ قالعاندارىن، كيىمدەرىن جانە جەكە زاتتارىنىڭ قايدا قويعانىن باقىلاپ وتىرعان.

ودان ايعاق زاتتار تابىلدى. قازىرگى كەزدە كۇدىكتىنىڭ باسقا قىلمىستارعا قاتىسى تەكسەرىلىپ جاتىر. ول ۋاقىتشا ۇستاۋ اباقتىسىنا قامالدى، سوت الدىنداعى تەرگەۋ امالدارى جۇرگىزىلۋدە.

اۆتور: قانات مامەتقازى ۇلى